Eki aıda Qazaqstannan janarmaıdy zańsyz áketpek bolǵan 300-ge jýyq adam ustaldy
Bıylǵy 31 qańtardan bastap Qazaqstan aýmaǵynan janar-jaǵarmaı ónimderin zańsyz alyp ketýdiń 288 faktisiniń joly kesilgen. Bul týraly QR QM Memlekettik kirister komıtetiniń baspasóz qyzmetinde málim etti, dep habarlaıdy Almaty-akshamy.kz Azattyq Ruhy-na silteme jasap.
«Qazaqstan Respýblıkasynyń aýmaǵynan benzındi, dızel otynyn jáne munaı ónimderiniń keıbir túrlerin avtomobıl kóligimen áketýge tyıym salynǵan sátten bastap memlekettik kirister organdarymen munaı ónimderin úshinshi elderge zańsyz áketýdiń 94 faktisi anyqtalǵan, olar boıynsha sotpen 1,5 mln. teńgeden astam aıyppul salynyp jáne 2 341 lıtr benzın men 25 335 lıtr dızel otyny tárkilendi», - delingen komıtet habarlamasynda.
EAEO memleketterimen shekarada 63 myń lıtrden astam (63820 l) janar-jaǵarmaı ónimderin shyǵarýdyń 194 faktisi anyqtaldy.
«QR QM Memlekettik kirister komıteti joǵaryda kórsetilgen tyıym (31.01.2023j.) kúshine engen kúnnen bastap elektrondyq deklarasıalaýdyń «ASTANA-1» aqparattyq júıesinde munaı ónimderin kedendik deklarasıalaýǵa jol bermeý úshin tıisti sharalardy qabyldaǵan» - delingen habarlamada.
Osy shekteýge qatysty ákimshilendirý jumystary turaqty negizde alty aılyq tyıym salý kezeńinde júzege asyrylady.