Búginde bizde saıası menedjerlerdi daıyndaý isi aqsap tur.
Jastar men qabiletti kadrlarǵa jol bermeýimiz - úlken kemshiligimiz. Bul týraly QR Prezıdenti Qasym-Jomart Toqaev aıtty, dep habarlaıdy Almaty-akshamy.kz QazAqparatqa silteme jasap.
«Saıası kadrlardy daıyndaý. Partıamyz kadrlar ustahanasyna aınalyp, saılaýshylarmen jumys isteı alatyn qazirgi zaman saıasatkerlerin jáne memlekettik qyzmetshilerdi daıyndaýy tıis. Ashyǵyn aıtsaq, búginde bizde saıası menedjerlerdi daıyndaý isi aqsap tur. Qazirgi jaǵdaıda saıası basshylar túrli mamandyq ıelerimen, jastarmen, jýrnalısermen, halqymyzdyń barlyq ókilimen sóılese bilýi tıis jáne de mundaı adamdar bizde az emes. Bir ǵana problema – ol áleýmettik lıftiniń joqtyǵy. Biz jastar men qabiletti kadrlarǵa jol bermeımiz jáne bul - bizdiń úlken kemshiligimiz», - dedi Memleket basshysy AMANAT partıasynyń kezekten tys sezinde.
QR Prezıdenti partıa qurylymynda saıası menedjment akademıasy jumys isteıtindigin jáne onyń jumysyn kúsheıtý qajettigin basa aıtty.
«Bir rettik semınarlar men trenıńterden depýtattardy, ákimderdi, mınıstrlerdi jáne ózge de partıadan usynylatyndardy daıyndaıtyn tolyqqandy baǵdarlamaǵa kóshý kerek. Jergilikti jerlerde partıalyq aktıvterdi oqytý úshin kóshpeli trenıńterdi de júıeli túrde ótkizgen jón. Men aıtqan barlyq mindetterdi barynsha qysqa merzimde oryndaý qajet bolady. Saılaýshylardyń partıaǵa senimin arttyrý úshin jumystyń burynǵy formaldy ádisinen bas tartý kerek», - dedi Qasym-Jomart Toqaev.