Jastar saıasaty jónindegi keńestiń quramyna kimder endi?
Bul týraly QR Memlekettik hatshysy Erlan Qarın Facebook paraqshasynda jazdy, dep habarlaıdy Almaty-akshamy.kz
«Qazaqstan Respýblıkasy Prezıdenti janyndaǵy Jastar saıasaty jónindegi keńestiń jańa quramy bekitildi. Onyń quramyna qoǵam belsendileri, jas ǵalymdar men kásipkerler, aýyl, óńir jáne shyǵarmashyl jastardyń ókilderi, «Táýelsizdik urpaqtary» grantynyń ıegerleri, Prezıdenttik kadr rezerviniń músheleri, jastar uıymdarynyń kóshbasshylary kirdi. Bul jastardyń barlyǵy - óz salasynyń maıtalman mamandary. Óskeleń urpaqtyń ózekti máselelerin jaqsy biledi. Ártúrli jas býynnyń arasynda zor bedel men senimge ıe», - dep atap ótti Memlekettik hatshy.
Onyń aıtýynsha, jańa quram jastar saıasatyn jetildirýge baılanysty tujyrymdamalyq qujattar men usynystardy ázirleýge atsalysady.
«Jaqynda keńestiń múshelerimen ZOOM arqyly kezdesip, aldaǵy josparlarymyz ben jumys tártibin aqyldastyq. El damýynyń jańa kezeńinde keńes jastardyń kún tártibinde turǵan máselelerin sheshýdiń naqty alańyna aınalady dep úmittenemin», - dep atap ótti Erlan Qarın.