Qosymsha qarjy tek qana komýnaldyq ınfraqurylymdy jańǵyrtýǵa jumsalýy kerek. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Memleket basshysy Qasym-Jomart Toqaev aıtty, dep habarlaıdy Almaty-akshamy.kz. QazAqparatqa silteme jasap.
«Tarıfti ósirýden túsken qosymsha qarjy tek qana komýnaldyq ınfraqurylymdy jańǵyrtýǵa jumsalýy kerek. Sondaı-aq jańa qýat kózderin iske qosýǵa jáne jumysshylardyń jalaqysyn kóterýge baǵyttalýy qajet. Monopolıserdiń mindeti muqıat naqtylanyp, tolyǵymen oryndalýy tıis. Sondyqtan Úkimetke qarjynyń jumsalýyn baqylaıtyn qatań amal-tásilder engizýdi tapsyramyn. Oǵan sıfrlyq baqylaý júıesin de engizý kerek», – dedi Qasym-Jomart Toqaev.
Osy oraıda Prezıdent bul saladaǵy qarajattyń ıgerilýin qatań baqylaý kerek ekenin aıtty.
«Jurt komýnaldyq qyzmet úshin tólegen aqshasynyń qaıda ketip jatqanyn kórip otyrýy tıis. Qazirgi zamanǵy aqparattyq tehnologıa buǵan tolyq múmkindik beredi», – dedi Memleket basshysy.