Kezdesý barysynda Memleket basshysyna Eýrazıalyq damý banki (EDB) jumysynyń nátıjeleri jáne Qazaqstanmen yntymaqtastyqty odan ári jalǵastyrý jospary, sondaı-aq banktiń aldaǵy kezeńge arnalǵan boljamdary jóninde málimet berildi.
Bıyl bank elimizge 1,1 mıllıard dollardan asa qarjy quıýǵa jáne halyqaralyq ınvestısıalardyń qazaqstandyq jobalarǵa tartylýyna yqpal etýge nıetti. Kólik ınfraqurylymy jáne logıstıka, ónerkásip, agroónerkásip kesheni, jasyl energetıka jáne sý resýrstary sekildi salalarǵa basymdyq beriledi, dep habarlaıdy Almaty-akshamy.kz Aqordanyń resmı saıtyna silteme jasap.
Nıkolaı Podgýzov byltyr Eýrazıalyq damý banki Qazaqstanǵa quıylǵan ınvestısıa mólsherin 2021 jylmen salystyrǵanda 5 ese ósirip, 1,2 mıllıard dollarǵa jetkizgenin, barlyq josparly kórsetkishterdi asyra oryndaǵanyn aıtty.
Sonymen qatar Memleket basshysyna elaralyq ıntegrasıalyq jobalardyń júzege asyrylý barysy jóninde baıandaldy. Atap aıtqanda, Aıagóz – Baqty temirjol jelisiniń jáne Qazaqstan men Qytaı arasyndaǵy shekara ótkeliniń qurylysy, sondaı-aq Astrahan – Mańǵyshlaq sý qubyryn jańǵyrtý sıaqty jobalar.
Budan bólek, Prezıdentke EDB basqarma tóraǵasy bıyl 15-17 mamyr kúnderi Almatyda ótetin Azıa-Tynyq muhıty aımaǵynyń damý ınstıtýttary qaýymdastyǵynyń (ADFIAP) kezdesýine daıyndyq barysyn baıandady. Jıynǵa álemniń 40 elinen 80-nen astam damý ınstıtýty, sondaı-aq halyqaralyq qurylymdar, Qazaqstan men Ortalyq Azıa elderiniń salalyq mınıstrlikteri qatysyp, elimizdiń jáne Eýrazıalyq ekonomıkalyq odaqqa múshe memleketterdiń ekonomıkasyna ınvestısıa quıý máselelerin talqylaıdy.
Qasym-Jomart Toqaev ıntegrasıalyq úderisterde Eýrazıalyq damý bankiniń belsendi ról atqaratynynatap ótti. Onyń aıtýynsha, banktiń ınfraqurylymdy jańǵyrtý jáne salý jónindegi jobalarǵa qatysýy Qazaqstan ekonomıkasynyń damýyna aıtarlyqtaı úles qosady.