Kezdesý barysynda saýda-ekonomıkalyq baılanystardy nyǵaıtýǵa basa mán berilip, Qazaqstan men Grekıa arasyndaǵy yntymaqtastyqty damytý perspektıvalary talqylandy.
Memleket basshysy Grekıanyń Eýropalyq Odaqqa múshe memleketter arasynda mańyzdy seriktes elderdiń biri ekenin atap ótti. Sondaı-aq eki el kópjaqty alańdarda ózara tyǵyz qarym-qatynas jasap kele jatqanyn jetkizdi, dep habarlaıdy Almaty-akshamy.kz Aqordanyń resmı saıtyna silteme jasap.
Óz kezeginde Nıkolaos Dendıas ekijaqty jáne kópjaqty yntymaqtastyq máseleleri jóninde pikir almasýǵa múmkindik bergeni úshin Qasym-Jomart Toqaevqa alǵys aıtty.
«Biz Qazaqstandy óńirdegi turaqtylyqqa kepil bolatyn Ortalyq Azıadaǵy eń iri jáne basymdyqqa ıe el retinde qarastyratynymyzdy atap ótkim keledi. Grekıa Sizdiń elińizben ózara tıimdi yntymaqtastyqty odan ári nyǵaıtýǵa daıyn», – dedi mınıstr.
Sonymen qatar olar áńgimelesý barysynda halyqaralyq jáne óńirlik kún tártibindegi ózekti máseleler jóninde pikir almasty.
«Grekıamen aradaǵy baılanystar biz úshin basymdyq sanalatynyn taǵy da atap ótkim keledi. Biz ózara yntymaqtastyq kórsetkishterin jańa deńgeıge kóterý úshin qoldan kelgenniń bárin jasaımyz», – dedi Prezıdent.