Memleket basshysy Qasym-Jomart Toqaev BUU delegasıasymen – BUU Bas hatshysynyń orynbasary – BUU Azıa jáne Tynyq muhıty úshin ekonomıkalyq jáne áleýmettik komısıasynyń Atqarýshy hatshysy Armıda Alısdjabanmen, Bas hatshynyń saıası máseleler jónindegi kómekshisi Mıroslav Enchımen jáne BUU Bas hatshysynyń kómekshisi – BUU Damý baǵdarlamasy ákimshisiniń kómekshisi Ivana Jıvkovıchpen kezdesý ótkizdi, dep habarlaıdy almaty-akshamy.kz
Kezdesýge qatysýshylar Qazaqstan men BUU ınstıtýttary arasyndaǵy kópjaqty yntymaqtastyqty damytý perspektıvalaryn talqylady, sondaı-aq halyqaralyq jáne óńirlik kún tártibindegi ózekti máseleler jóninde pikir almasty.
Prezıdent Astana halyqaralyq forýmyna belsendi qatysqany úshin dıplomattarǵa rızashylyǵyn bildirip, olardyń BUU aıasyndaǵy usynystary forým jumysynyń mazmunyn baıytýǵa úles qosqanyn aıtty.
Memleket basshysy BUU-nyń beıbitshilikti nyǵaıtý, qaýipsizdik pen jahandyq damýdy qamtamasyz etý isindegi aıryqsha róline nazar aýdardy. Qasym-Jomart Toqaev BUU Qaýipsizdik Keńesin jan-jaqty reforma júrgizý qajettigine jáne osy organnyń ókildigin keńeıtýdiń mańyzdylyǵyna toqtaldy.
Prezıdent osy ámbebap uıymnyń rólin nyǵaıtý maqsatynda Qazaqstan BUU-men kúsh biriktirýge nıetti ekenin rastady.
Qazaqstanda BUU-nyń 20-dan astam bólimshesi tabysty jumys istep jatyr. Osy rette Almaty qalasynda Ortalyq Azıa men Aýǵanstan úshin Ornyqty damý maqsattary jónindegi óńirlik ortalyq qurý mańyzdy ekeni atap ótildi. Bul ortalyqtyń qyzmeti 2030 jylǵa deıingi kún tártibin ilgeriletý úshin keshendi sharalar qabyldaý arqyly BUU agenttikteriniń óńirdegi elder úkimetterimen aradaǵy úılesimdilikti nyǵaıtýǵa baǵyttalady.
Óz kezeginde joǵary laýazymdy dıplomattar Astana halyqaralyq forýmy týraly ózderiniń áserin ortaǵa salyp, qazirgi zamannyń ózekti syn-qaterlerin sheshý tásilderin ázirleýde osy alań strategıalyq turǵyda mańyzdy ekenin atap ótti.
Sondaı-aq kezdesýde kólik-logıstıka áleýeti men sıfrlandyrý prosesi turǵysynan Ortalyq Azıanyń strategıalyq róline nazar aýdaryldy.
Kezdesý sońynda Memleket basshysy BUU Bas hatshysy Antonıý Gýterrıshke júrekjardy sálemin joldady.