Dúnıejúzi buryn-sońdy bolmaǵan geosaıası jáne ekonomıkalyq turaqsyzdyqpen betpe-bet kelip otyr
Prezıdent Qasym-Jomart Toqaev QHR Tóraǵasy Sı Szınpınniń shaqyrýymen BRIKS+ uıymynyń jahandyq damý jónindegi joǵary deńgeıli dıalogyna onlaın formatta qatysty, dep habarlaıdy Almaty-akshamy.kz Aqordanyń baspasóz qyzmetine silteme jasap.
«BRIKS elderi arasynda joǵary deńgeıdegi seriktestik qatynas ornatý, jahandyq damýdyń jańa dáýirin qurý» atty taqyryptaǵy BRIKS-tiń 14-sammıti Qytaıdyń tóraǵalyǵymen ótip jatyr.
«Qazaqstan BRIKS-ti yqpaldy uıym ári álemdik ekonomıkanyń ósimin órge súırep kele jatqan negizgi kúshterdiń biri retinde qarastyrady. Qazaqstan BRIKS elderimen qarqyndy seriktestikti damytýǵa múddeli. Sondaı-aq byltyr bul Uıymǵa múshe eldermen aradaǵy taýar aınalymy 45 mıllıard AQSH dollarynan asty. Osyǵan oraı aldaǵy ýaqytta bul kórsetkishti arttyrý úshin mol múmkindik bar», – dedi Prezıdent.
Qasym-Jomart Toqaev álemdik damý jóninde aıta kele, qazir dúnıejúzi buryn-sońdy bolmaǵan geosaıası jáne ekonomıkalyq turaqsyzdyqpen betpe-bet kelip otyrǵanyna nazar aýdardy.
«Sońǵy birneshe aıda álemde azyq-túlik máselesine qatysty jaǵdaı kúrdelenip ketti. Eger azyq-túlik jetkizý jelisiniń buzylýy jalǵasa berse, mıllıondaǵan adamnyń ómirine qaýip tónedi. Búginde álemdegi eń iri azyq-túlik óndirýshilerdiń tórtten úshi BRIKS elderi jáne osy Uıymǵa múshe memleketterdiń aýyl sharýashylyǵy boıynsha jalpy ishki ónimi búkilálemdik ónimniń jartysynan astamyn quraıdy», – dedi Qazaqstan Prezıdenti.
Qasym-Jomart Toqaev álem boıynsha ınflásıanyń qarqyndy ósýi sheshimin qajet etetin taǵy bir ózekti mindet ekenin atap ótti. Onyń aıtýynsha, qarjy ahýalynyń nasharlaýy qaryzy kóp memleketterge, bıznes pen otbasylardyń turmystyq jaǵdaıyna aýyr tıip qana qoımaı, jahandyq jetkizý jelisiniń buzylýyna ákep soqtyrady.
«Qazaqstan Shyǵys pen Batys, Ońtústik pen Soltústik arasyndaǵy «aralyq naryq» retinde paıdasyn tıgize alady. Uzaq merzimdi perspektıvada bizge ashyq, ádil, ózara úılesimdi ári ornyqty jahandyq ekonomıkany saqtap qalý kerek. Bul rette, ósim men ózara baılanystylyqtyń jańa dáýirine jol ashatyn BRIKS+ jáne «Bir – beldeý, bir – jol», sondaı-aq Úlken Eýrazıalyq seriktestik bastamalarynyń mol áleýeti bar ekenin kórip otyrmyn», – dedi Prezıdent.
Prezıdent Ornyqty damý salasyndaǵy maqsattarǵa qol jetkizýdiń mańyzdy ekenine nazar aýdardy.
«BUU Bas hatshysy Antonıý Gýterrıshtiń Samıtti kelesi jyly shaqyrý arqyly BUU-nyń 2030 jylǵa deıingi kún tártibin júzege asyrýǵa kúsh salý jónindegi belsendiligin quptaımyn. Biz barlyǵyn, ásirese, áıelderdi, jastar men balalardy, egde adamdar men múmkindigi shekteýli jandardy eskerýsiz qaldyrmaı, óz mindettemelerimizdi naqtylaýymyz qajet. BRIKS+ elderi Soltústik pen Ońtústik arasyndaǵy alshaqtyqty qysqartýǵa jáne damýdaǵy teńsizdikti joıýǵa óz úlesin qosa alar edi», – dedi Memleket basshysy.
Qasym-Jomart Toqaev 2030 jylǵa deıingi kún tártibin júzege asyrý aıasynda aımaqtyq yqpaldastyqtyń mańyzdy ekenine basa mán berdi.
«Biz Almaty qalasynda Ortalyq Azıa men Aýǵanstannyń ornyqty damýyn kózdeıtin BUU Ortalyǵyn ashý jónindegi ıdeıany ilgerilete beremiz. Sý, energetıka jáne azyq-túlik qaýipsizdigine qatysty aımaqtaǵy ýshyǵyp kele jatqan qatermen kúresýimiz qajet», – dedi Memleket basshysy.
Qazaqstan Prezıdenti sózin qorytyndylaı kele, árbir daǵdarystyń qaýipti jaǵy da, múmkindigi de bar ekenin atap ótti.
«Bul jerde biz adamdardyń múddesi bárinen joǵary degen adamgershilik qaǵıdatyn basshylyqqa alýǵa tıspiz. BRIKS plús platformasy osy ıgi iske laıyqty úlesin qosady dep senemin. Qazaqstan óziniń ulttyq múddelerin jahandyq mindettemelermen úılestirýge tolyq ázir», – dedi Qasym-Jomart Toqaev.