Prezıdent Qasym-Jomart Toqaev Bashqurtstan Respýblıkasynyń basshysy Radıı Habırovty qabyldady, dep habarlaıdy almaty-akshamy.kz.
Qasym-Jomart Toqaev Astana men Máskeýdiń ekijaqty baılanystaryn nyǵaıtýǵa óńiraralyq yqpaldastyq eleýli úles qosyp otyrǵanyn atap ótti. Osy oraıda Bashqurtstan Respýblıkasy erekshe ról atqarady.
– Qazaqstan men Reseı arasyndaǵy jan-jaqty qatynastarǵa tyń serpin berý turǵysynan alǵanda búgingi saparyńyzdyń máni zor. Biz ındýstrıa, agroónerkásip kesheni jáne gýmanıtarlyq salalardaǵy baılanystarymyzdy ártaraptandyrý úshin barynsha kúsh salamyz, - dedi Memleket basshysy.
Prezıdent birqatar kelisimniń, sonyń ishinde úkimetter deńgeıinde qol qoıylǵan Yntymaqtastyqtyń 2023-2024 jyldarǵa arnalǵan jol kartasynyń tabysty júzege asyrylyp jatqanyna nazar aýdardy. Memleket basshysy elimizdiń óńirleri men Bashqurtstan arasyndaǵy taýar aınalymynyń qarqynyn oń baǵalady. Byltyrǵy 11 aıdyń qorytyndysy boıynsha saýda-sattyq deńgeıiniń kórsetkishi 350 mıllıon dollardan asty. Bul rette Qazaqstan Bashqurtstan Respýblıkasynyń jetekshi saýda seriktesteriniń úshtigine kiredi.
Óz kezeginde Radıı Habırov qazaq jerinde qonaqjaılyq kórsetkeni úshin Qasym-Jomart Toqaevqa alǵys aıtty.
– Bashqurtstan men Qazaqstan arasyndaǵy qarym-qatynasty damytýǵa erekshe mán beretinińizdi bilemiz. Menimen birge úlken delegasıa keldi. 2-3 jyldyń ishinde biz taýar aınalymy men ónerkásip kooperasıasynyń kólemin aıtarlyqtaı ulǵaıttyq. Búgin «Qazaqstan – Bashqurtstan» forýmyn ashtyq. Biz úshin Qazaqstan – eń basty seriktes. Biz munda ózimizdi erkin sezinemiz, – dedi Radıı Habırov.
Kezdesýde saýda-ekonomıkalyq, mádenı-gýmanıtarlyq, ónerkásip jáne ózara múddeni kózdeıtin basqa da salalardaǵy yntymaqtastyqty jandandyrýǵa basa mán berildi.