Balalar úıirmelerine qatysty jobada qarjy jymqyrý isi kóp.
Bul týraly Memleket basshysy Qasym-Jomart Toqaev Úkimettiń keńeıtilgen otyrysynda aıtty, dep habarlaıdy Almaty-akshamy.kz.
«Kelesi másele – qosymsha bilim berý. Bul – óskeleń urpaqtyń qarym-qabiletin damytý úshin qolǵa alynǵan bastama. Qosymsha sporttyq jáne shyǵarmashylyq bilim berý isine memleket tapsyrysy boıynsha qarjy bólinetin boldy. Bul qadam úıirmeler men seksıalarǵa qatysatyn balalardyń sanyn 70 paıyzǵa deıin arttyrdy. Muny strategıalyq turǵydan durys sheshim boldy dep sanaımyn.
Degenmen, joba iske qosylǵan jyly birqatar olqylyqqa jol berildi. Iaǵnı, qarjy máselesine jáne tıisti portaldyń («Artsport») jumysyna qatysty qatelikter boldy. Qarjyny artyq jumsaý, alaıaqtyq, ashyqtan-ashyq jymqyrý bastaldy. Ata-analar balalaryn birden birneshe úıirmege beretin boldy. Ókinishke qaraı, mundaı teris pıǵyl basqa balalardyń jolyn kesip otyr», - dedi Prezıdent.
Osy oraıda Memleket basshysy kemshiliktiń bárin túzetip, osy ıgi bastamany jalǵastyrý qajet ekenin aıtty.
«Ákimdikter jáne máslıhattar qosymsha bilimge bólinetin búdjet qarajaty jetpeı qalýy múmkin dep alańdap otyr. Bilimge salynǵan qarajat – memleket úshin eń basty ınvestısıa bolýy kerek. Bul – óte mańyzdy másele. Túptep kelgende, damýdyń birden-bir joly – bilim salasy. Sondyqtan budan eshkim utylmaıtyny sózsiz. Úkimet pen ákimder jurtshylyqpen birlesip, jobany jetildirýi tıis», - dedi ol.