Memleket basshysyna elordanyń áleýmettik-ekonomıkalyq jáne ınfraqurylymdyq damýy týraly baıandaldy, dep habarlaıdy almaty-akshamy.kz
Ákimdiktiń málimeti boıynsha bıylǵy 5 aıda tartylǵan ınvestısıa kólemi 425 mıllıard teńgeden asyp, byltyrǵy osy kezeńmen salystyrǵanda ósim 20 paıyzdan artty. Sondaı-aq 2023 jyly 25 ınvestısıalyq jobany iske qosý josparlanyp otyr. Bul 87 mıllıard teńge kóleminde qarjy tartýǵa jáne 1,8 myń jumys ornyn ashýǵa múmkindik beredi.
Sonymen qatar Prezıdentke turǵyn úı alaptaryn damytý, apatty jaǵdaıdaǵy eski turǵyn úılerdi buzý, áleýmettik nysandar salý, qurylysy uzaqqa sozylǵan nysandardy aıaqtaý, shaǵyn jáne orta bıznesti qoldaý, jumys oryndaryn ashý jáne qalany abattandyrý máseleleri jóninde esep berildi.
Jeńis Qasymbektiń aıtýynsha, bıyl 6 myńǵa jýyq áleýmettik jeńildikpen beriletin páter jáne 16 úleskerlik qurylys nysanyn salý jumystaryn aıaqtaý josparlanyp otyr. Sondaı-aq elordanyń kólik ınfraqurylymyn damytý maqsatynda bıyl Táýelsizdik dańǵylyndaǵy kópir qurylysy aıaqtalyp, qalanyń qoǵamdyq kólik baǵdarlary boıynsha 400 jańa avtobýs paıdalanýǵa beriledi.
Budan bólek, Memleket basshysyna aýyzsý stansıasy (SSS-3), jylý elektr ortalyqtary, gaz jylý stansıalary qurylysynyń barysy týraly málimet berildi. Mysaly, SSS-3 stansıasy paıdalanýǵa berilgennen keıin onyń qýaty táýligine 100 myń tekshe metr sý jetkizýge jetedi. SSS-3 stansıasynyń birinshi kezeńin maýsym aıynyń sońynda, ekinshi kezeńin bıyl tamyzda iske qosý josparlanyp otyr. Buǵan deıin Astana sý qoımasynan sý qubyryn tartý jumystary bastalǵan bolatyn.
Memleket basshysynyń tapsyrmasy boıynsha qalany kógaldandyrý jáne abattandyrý jumystary júıeli júrgizilip jatyr. Bıyl 150-den astam aýla men qoǵamdyq oryndardy abattandyrý josparlanǵan.
Kezdesý sońynda Qasym-Jomart Toqaev Astananyń áleýmettik jáne ınjenerlik ınfraqurylymyn odan ári damytý, qalany abattandyrý, kógaldandyrý, sondaı-aq jylytý maýsymyna daıyndyq jóninde birqatar tapsyrma berdi.