Almatyda tanymal akter Iýrıı Pomeransevtiń qurmetine músin ashyldy
Almatyda M. Lermontov atyndaǵy Ulttyq orys drama teatry ǵımaratynyń aldynda qala ákimdiginiń qoldaýymen «bizdiń súıikti dárigerimiz» – ataqty akter Iýrıı Pomeransevtiń qola músini ashyldy. Saltanatty sharaǵa Almaty ákimi Erbolat Dosaev,mesenat Nurlan Smaǵulov, shyǵarmashylyq zıaly qaýym ókilderi, qoǵam qaıratkerleri jáne t. b. qatysty, dep habarlaıdy almaty-akshamy.kz
«Bul – bizdiń qala men onyń mádenıeti úshin mańyzdy oqıǵa. Men úshin naǵyz almatylyq, kórnekti teatr jáne kıno ártisi, rejıser, QazKSR halyq ártisi, eńbek eri, Qazaqstannyń Eńbek Eri, bárimiz «bizdiń súıikti dáriger» retinde jaqsy kóretin Iýrıı Borısovıch Pomeransevke arnalǵan eskertkishtiń ashylýyna qatysý erekshe qurmet. Meniń artymda onyń týǵan teatry bar. Iýrıı Borısovıch – óz kásibine, ónerine jáne teatryna adaldyqtyń aıryqsha úlgisi. Ol munda 70 jylǵa jýyq qyzmet etti jáne Lermontov atyndaǵy Ulttyq orys drama teatrynyń sahnasyna adal boldy», - dedi Almaty ákimi Erbolat Dosaev.
Músin Nurlan Smaǵulov qorynyń bastamasymen jáne qoldaýymen ornatyldy. Smaǵulov atap ótkendeı, «Almaty Iýrıı Borısovıchsiz Almaty bolmas edi. Ol qalamyzdy óte jaqsy kórdi,zıaly qaýym jáne almatylyqtardyń kóptegen urpaqtary úshin óshpes mura qaldyrdy! Bizdiń Qor Iýrıı Borısovıch bárimizdiń jadymyzda qalýyn ózine mindet sanady. Menińshe, músinniń sýretshiler, kórermender nemese stýdentter beınesinde taǵy bir qasıetti bóligi paıda bolýy múmkin, bizdiń orys drama teatrynyń dástúrlerin eske alý maqsatynda».
Bul – Nurlan Smaǵulov Qory qala turǵyndaryna syılaǵan tórtinshi músin. Qazaqstandyq mesenattyń oıynsha, qalada kórnekti almatylyqtardyń músinder serıasy paıda bolýy tıis.
Sháken Aımanovtyń alǵashqy músini 2019 jyly «Almaty» qonaq úıiniń janyna ornatyldy – bul sol kezdegi shyǵarmashylyq zıaly qaýym jınalǵan jáne «Taqıaly perishte» kınosy túsirilgen oryn. Gerold Belgerdiń ekinshi músini 2021 jyly ashyldy, ol Gerold Karlovıch sońǵy jyldary turǵan úıdiń janynda ornalasqan. Qazaqstandyq álpınıs Anatolıı Býkreevtiń shyńǵa shyǵar aldyndaǵy demalý sátin beınelegen músini Medeý shatqalynda ornalasqan.
Iýrıı Pomeransevtiń músinin áıgili qazaqstandyq músinshi Nurlan Dalbaı jasaǵan. Músinnen biz jas, baqytty, kúsh pen úmitke toly Iýrıı Borısovıchti kóremiz, eskertkishte Sháken Aımanov (1957 jyl) túsirgen «Bizdiń súıikti dáriger» fılmindegi dárigerdiń beınesi jaqsy kórinis tapqan.
Eskertkishtiń ashylý rásimine ártistiń týystary, dostary, M.Lermontov atyndaǵy Ulttyq orys drama teatrynyń akterleri men qyzmetkerleri keldi.
«Men Qazaqstanda dúnıege keldim jáne 60 jyldan beri Lermontov atyndaǵy Ulttyq orys drama teatrynda jumys isteımin. Iýrıı Borısovıchtiń qasynda meniń búkil ómirim ótti, onyń ishinde sahna artyndaǵy jáne gastróldik. Ol búginde álemdegi kez-kelgen teatrdyń sahnasyn aıshyqtaıtyn adam jáne keremet akter boldy. Biz álemniń túkpir- túkpirin jıi aralaımyz, biraq teatrǵa, ónerge degen osyndaı keremet jáne erekshe kózqarasty men tek Qazaqstanda ǵana keziktirdim, sonyń arqasynda bizdiń teatr jyldan jylǵa jaqsaryp keledi», - dedi ashylý saltanatynda QR Eńbek sińirgen ártisi Gennadıı Balaev.
Kózi tiri bolsa, 2023 jyldyń 11 aqpanynda Pomeransev óziniń 100 jyldyq mereıtoıyn atap óter edi. Iýrıı Pomeransev – teatr jáne kıno akteri, rejıser, Uly Otan soǵysyna qatysýshysy. Iýrıı Pomeransev «Erligi úshin» medalimen, II dárejeli Otan soǵysy ordenimen, «Qazaqstannyń Eńbek Eri» ataǵymen, sondaı-aq kóptegen ordendermen marapattaldy.
Ol óziniń mansabyn Almaty sahnasynda 1943 jyly Abaı atyndaǵy opera jáne balet teatrynyń horynda bastaǵan, keıin TÚZa akteri, al 1954 jyldan bastap Lermontov atyndaǵy orys drama teatrynda boldy. Pomeransev Keńes kınosynyń altyn qoryna engen fılmderde 300-den astam róldi somdady. Almatylyqtardyń jadynda aty ańyzǵa aınalǵan akter «bizdiń súıkimdi dáriger» retinde máńgi saqtalady.