Búgin Aqordada Prezıdent Qasym-Jomart Toqaevtyń qatysýymen AHQO Sotynyń jańadan taǵaıyndalǵan tóraǵasy lord Ian Bernettiń resmı ant berý rásimi ótti.
Jıynǵa AHQO Basqarýshysy Renat Bekturov, AHQO Halyqaralyq arbıtraj ortalyǵynyń tóraǵasy Tomas Krúmmel, sondaı-aq AHQO Sotynyń tirkeýshisi jáne Halyqaralyq arbıtraj ortalyǵynyń apparat jetekshisi Krıstofer Kempbell-Holt qatysty.
Resmı jıynda sóz sóılegen Memleket basshysy bul ınstıtýttyń komersıalyq daýlardy sheshýde eleýli qyzmet atqaratynyn atap ótti.
– «Astana» halyqaralyq qarjy ortalyǵy ınvestorlar senim artatyn mańyzdy alań sanalady. Osy oraıda halyqaralyq standarttarǵa saı táýelsiz sot júıesi bar AHQO Soty negizgi ról atqarady. Qurmetti lord Bernett, Sizdi osynaý jaýapty laýazymǵa taǵaıyndalýyńyzben quttyqtaımyn. Sizdiń kandıdatýrańyzdyń tańdalýy AHQO sot júıesiniń turaqtylyq jáne senimdilik qaǵıdattaryn saqtaýǵa beıil ekenin taǵy da rastaıdy, - dedi Qasym-Jomart Toqaev.
Prezıdent óz mindetin yjdaǵattylyqpen oryndap, AHQO Sotynda qaralǵan ár iste ádilettilikti jáne ádil sot tóreligin qamtamasyz etýge kúsh salǵany úshin Sottyń burynǵy tóraǵasy lord Djonatan Mansqa rızashylyǵyn bildirdi.
Jıynnan keıin Memleket basshysy sharaǵa qatysýshylarmen AHQO Sotyn jáne Halyqaralyq arbıtraj ortalyǵyn elimizdiń ınvestısıalyq tartymdylyǵyn arttyrýǵa yqpal etetin negizgi táýelsiz ınstıtýttar retinde damytý perspektıvasyn talqylady. Prezıdent daýlardy sheshýge qatysty halyqaralyq quqyqtyń úzdik tájirıbesin engizý, sondaı-aq zamanaýı tehnologıany, onyń ishinde jasandy ıntellektiniń áleýetin belsendi túrde paıdalaný mańyzdy ekenin aıtty.