Memleket basshysy Qasym-Jomart Toqaev áleýmettik-azamattyq belsendiligi men azamattyq jaýapkershiligi úshin qalalyq avtobýs júrgizýshisiniń biri Qanat Ahmetovti «Shapaǵat» medalimen marapattady, dep habarlaıdy Aqshamnews.kz
Memlekettik nagradany Almaty ákiminiń orynbasary Asqar Ámrın tabystady. Ol Qanat Ahmetov 2025 jyly Prezıdent jumysshy mamandyqtar jyly dep jarıalaǵan soń marapatqa ıe bolǵan eńbek mamandyqtarynyń alǵashqy ókili bolǵanyn atap ótti.
«Memlekettik nagradaǵa ıe bolý men úshin úlken qurmet ári zor jaýapkershilik. Bul qoǵam ıgiligi úshin adal eńbek etýge, áriptesterim men jaqyndaryma úlgi bolýǵa yntalandyrady. Qarapaıym eńbek adamdaryna Prezıdenttiń nazar aýdaryp, eldiń damýyna qosqan úlesin moıyndaǵany qýantady», – dedi Qanat Ahmetov.
Eske sala keteıik, buǵan deıin №66 qalalyq marshrýt avtobýsynyń júrgizýshisi Qanat Ahmetov arbadaǵy múgedek jolaýshyǵa nazar aýdaryp, kómek kórsetkeni úshin megapolıs ákimi Erbolat Dosaevtyń atynan alǵys hat pen syılyq alǵan bolatyn.
Qanat Ahmetov tórt bala tárbıelep otyr, «Almatyelektrotrans» kompanıasynda avtobýs júrgizýshisi bolyp jumys istegenine bir jyldaı ýaqyt boldy. Múgedek jolaýshynyń kólikke arnaıy kótergishtiń kómegimen minýine járdemdeskeni týraly oqıǵa áleýmettik jelide kóptegen jaǵymdy pikirge ıe bolyp, qala turǵyndarynyń alǵysyn alǵan.