Qaza bolǵan beıbit turǵyndardyń naqty sanyn anyqtaý
Memleket basshysy Qasym-Jomart Toqaev Almatyda jappaı tártipsizdikter kezinde qaza bolǵan beıbit turǵyndardyń naqty sanyn anyqtaýdy tapsyrdy, dep habarlaıdy Almaty-akshamy.kz Aqordaǵa silteme jasap.
Bul týraly Prezıdent búgin kúshtik qurylymdardyń basshylarymen kezdesýinde aıtty.
«Keńes qorytyndysy boıynsha Qasym-Jomart Toqaev birqatar naqty tapsyrmalar berdi. Qazaqstanda, sonyń ishinde Almatyda bolǵan qaıǵyly jaǵdaılardy jan-jaqty zertteý máselesine, qaza bolǵan beıbit turǵyndardyń naqty sanyn anyqtaýǵa, qıyn-qystaý kezderde kúshtik qurylymdardyń is-qımyldaryn úılestirýdiń jańa normatıvtik bazasyn ázirleýge basa mán berildi. Qasym-Jomart Toqaev Qaýipsizdik Keńesiniń hatshysyna Arnaýly operasıalar kúshterin jasaqtaý jumystaryn jedeldetýdi jáne ulttyq qaýipsizdik júıesin qaıta qurý jóninde naqty usynys berýdi tapsyrdy. Prezıdent lańkestikke qarsy operasıalar men tergeý sharalaryn júrgizý barysynda azamattar quqyǵynyń buzylýyna jol bermeýdiń mańyzdy ekenin aıtty»,-delingen Aqorda taratqan aqparatta.
Aıta keteıik, Memleket basshysynyń qatysýymen ótken májiliske Jıynǵa Bas prokýratýranyń, Ulttyq qaýipsizdik komıtetiniń, Qorǵanys jáne İshki ister mınıstrlikteriniń birinshi basshylary, sondaı-aq Prezıdent Ákimshiliginiń basshylyǵy men Qaýipsizdik Keńesiniń Apparaty qatysty.
Memleket basshysyna qańtar aıynyń birinshi onkúndiginde elimizdiń birqatar óńirinde bolǵan oqıǵalar boıynsha sotqa deıingi aldyn ala tergeý amaldarynyń barysy, sondaı-aq arnaıy júrgizilgen operasıalardyń nátıjeleri, elimizde qoǵamdyq qaýipsizdik pen quqyqtyq tártipti qamtamasyz etý sharalary týraly baıandaldy.