Memleket basshysyna Almatynyń bıylǵy 11 aıdaǵy áleýmettik-ekonomıkalyq damýynyń aldyn ala qorytyndylary jóninde esep berildi.
Qasym-Jomart Toqaevqa atalǵan kezeń ishinde qysqa merzimdi ekonomıkalyq ındıkator 13 paıyzǵa artqany týraly baıandaldy. Memlekettik búdjet túsimderi 4,9 trıllıon teńgege jetti. Ósim kórsetkishi 34,5 paıyzdy qurady. Qarasha aıynda jyldyq ınflásıa 10,5 paıyzǵa deıin báseńdedi. Jalpy, jyl qorytyndysy boıynsha elimizdegi eń iri qala ekonomıkasynyń ósimi 6,5 paıyz deńgeıinde bolady degen boljam jasalyp otyr (2022 j. – 5,0%).
Prezıdentke negizgi kapıtalǵa quıylǵan ınvestısıanyń jalpy kólemi 20 paıyzǵa ulǵaıǵany jaıynda aqparat berildi. Jeke ınvestısıa 30,3 paıyzǵa artyp, 1,4 trıllıon teńgege jetken. Jyl basynan beri qala ekonomıkasyna barlyǵy 1,53 trıllıon teńge salyndy.
Erbolat Dosaevtyń aıtýynsha, Memleket basshysynyń tapsyrmasymen Almatyda qoǵamdyq kólikti damytý jáne ekologıalyq talaptarǵa sáıkestendirý úshin keshendi jumystar júrgizilip jatyr. Bıyl qalanyń avtobýs parki ekologıalyq taza 1150 jańa avtobýspen tolyqty. Onyń 550-in jeke tasymaldaýshylar satyp alǵan. Sońǵy 11 jylda alǵash ret troleıbýs parki de jańartyla bastady. Búginde 100 troleıbýs satyp alynǵan, qosymsha taǵy 100-in satyp alý arqyly kelesi jyly troleıbýs parki tolyqtaı jańarady.
Sonymen qatar Qasym-Jomart Toqaevqa jol-kólik ınfraqurylymynyń damýy týraly baıandaldy. Qalanyń 70 kóshesine 25 shaqyrym jańa jol salyndy jáne 200 shaqyrym jolǵa ortasha jóndeý jumystary júrgizildi.
Budan bólek, Prezıdentke áleýmettik ınfraqurylymdy jańǵyrtýǵa qatysty tapsyrmalarynyń oryndalýy týraly málimet berildi. Densaýlyq saqtaý salasynda medısınalyq-sanıtarıalyq alǵashqy kómektiń (MSAK) jańa biryńǵaı standarty belsendi túrde engizilýde. Almatyda «Jaıly mektep» ulttyq jobasy aıasynda 37,1 myń oryndyq 22 mekteptiń qurylysy men jobalaý jumystary bastaldy.
Jyl basynan beri NEET sanatyndaǵy 36,7 myń azamat jumysqa ornalastyrylǵan. Onyń 82 paıyzy – turaqty jumys orny. Qajetti mamandyqtardy oqytýdyń qysqa merzimdi kýrstary jáne Jobfair365 bos jumys oryndarynyń sıfrlyq platformasy iske qosylǵan. Jastar úshin 8 komúnıtı-ortalyǵy ashylǵan.
Erbolat Dosaevtyń aıtýynsha, Prezıdenttiń qalany kógaldandyrý jónindegi tapsyrmasynyń oryndalý barysy erekshe baqylaýda. Jyl basynan beri 276 myń túp kóshet otyrǵyzyldy. Jyl sońyna deıin olardyń sany 320 myńǵa jetkizilmek. Almatydaǵy saıabaqtar aýmaǵy 397 gektarǵa ulǵaıdy.
Kezdesý sońynda Qasym-Jomart Toqaev megapolıs ekonomıkasyn odan ári ártaraptandyrý, ınvestısıa tartý, shaǵyn jáne orta bıznesti qoldaý sharalaryn kúsheıtý jóninde naqty tapsyrmalar berdi. Sondaı-aq ákimge qoǵamdyq kólikti ekologıalyq talaptarǵa sáıkestendirý jáne Almatynyń kólik qatynastary júıesin damytý mindetin júktedi.