Qurylys 2024 jyly jazda aıaqtalady dep josparlanǵan.
Qasym-Jomart Toqaevtyń Almaty qalasyna jasaǵan jumys sapary ońtústik astana áýejaıynyń jańa halyqaralyq termınaly qurylysynyń kapsýlasyn salý rásimine qatysýmen aıaqtaldy, dep habarlaıdy Almaty-akshamy.kz
Memleket basshysy Almaty áýejaıy mańyzdy strategıalyq nysan jáne Qazaqstannyń áýe qaqpasy ekenin atap ótti.
«Jańa termınal salynǵannan keıin, áýejaıda jylyna 14 mıllıon jolaýshyǵa deıin qyzmet kórsetiletin bolady, ıaǵnı eki esege artady degen sóz. Jańa termınal eń ozyq tehnologıamen jabdyqtalyp, halyqaralyq standarttarǵa saı bolýy kerek. Eń bastysy, barlyq jumysty ýaqytynda aıaqtaý qajet», – dedi Prezıdent.
Qurylysqa salynǵan ınvestısıanyń jalpy kólemi 200 mıllıon dollardan asady. Jańa termınal tek halyqaralyq baǵyttaǵy reısterge, al qazirgisi ishki reısterge qyzmet kórsetedi.