Memleket basshysy Qasym-Jomart Toqaev Jetisý óńirindegi iri óndiris oshaqtarynyń biri sanalatyn «ALACEM» sement zaýytyn aralap kórdi, dep habarlaıdy almaty-aksamy.kz.
2020 jyly ındýstrıalandyrý baǵdarlamasy aıasynda iske qosylǵan Qazaqstan-Sıngapýr birlesken kásipornynda qurǵaq ádispen jylyna 1,5 mıllıon tonna sement óndiriledi. Joba quny – 47 mıllıard teńge. Zaýytta, negizinen, azamattyq jáne óndiristik nysandar qurylysynda keńinen paıdalanylatyn M400, M450, M500 markaly sement túrleri shyǵarylady. Mysaly, Úlken Almaty ózenine salynǵan «Aıýsaı» bógetiniń qurylysyna osy zaýyttyń ónimi qoldanylǵan.
Kásiporynnyń basqarýshy dırektory Stanıslav Sherbakovtyń aıtýynsha:
zaýyt Almaty qalasynyń, Jetisý jáne Almaty oblystarynyń sement ónimine degen suranysyn 65 paıyzǵa deıin qamtamasyz etedi. Jobany júzege asyrý barysynda ekologıalyq taza, qaldyqsyz óndiris standarttaryna saı keletin ozyq tehnologıalar qoldanylǵan. Sondaı-aq ónim prosesin basqarý úshin DCS ıntellektýaldy júıesi engizilgen;
➤ kásiporynnyń óndiris jáne kólik-logıstıkalyq ýchaskelerinde 600 adam jumys isteıdi. Olardyń basym bóligi – jergilikti turǵyndar. Sonymen qatar ónimdi ótkizý, dılerlik jeliler arqyly qosymsha 200-ge jýyq jumys orny ashyldy;
➤ kompanıa zaýytty iske qosqaly beri bıznestiń áleýmettik jaýapkershiligi aıasynda Kerbulaq aýdanynyń damýyna 2,7 mıllıard teńge qarjylaı qoldaý kórsetken. Bul qarajat Saryózek – Kóktal jolyn jóndeýge jáne aýdandaǵy áleýmettik jobalarǵa jumsaldy.
Sondaı-aq, Prezıdentke zaýyt jumysshylarymen áńgimelesip, osyndaı iri óndiristiń ashylýy qurylys ındýstrıasyn damytý, ásirese, jergilikti ınfraqurylymdy jetildirý úshin mańyzdy ekenin atap ótti.
▪️Buǵan qosa kompanıa quryltaıshylary elimizde júzege asyrylyp jatqan ınvestısıalyq jobalardyń aýqymyn keńeıtip jatyr. Atap aıtqanda, 2021 jyly Abaı oblysynyń Jarma aýdanyndaǵy «Qazaqsement» kásipornyn satyp alyp, modernızasıa jasaý arqyly 450 jumys ornyn ashqan.
▪️Sonymen qatar taıaý jyldary Jambyl oblysy Qordaı aýdanynda taǵy bir sement óndirý zaýyty iske qosylmaq. Zaýyt ónimi kórshiles Qyrǵyzstan men Ózbekstan memleketterine eksporttalady.