Prezıdent Ahýaldyq ortalyqty aralap kórdi

 Memleket basshysy Almaty qalasynyń tynys-tirshiligi týraly jan-jaqty aqparat beretin Ahýaldyq ortalyqty aralap kórdi.

Qasym-Jomart Toqaevqa qala ákimi Erbolat Dosaev atalǵan ortalyq Big Data taldaýy men Open Data tujyrymdamasyn engizý negizinde sapaly sheshimder qabyldaý úshin tıimdi qural bolatynyn aıtty, dep habarlaıdy almaty-akshamy.kz. 

Bul ortalyq megapolıstegi ómirdiń barlyq aspektisine qatysty derekterdi jınap, taldaýǵa, halyqty qulaqtandyrýǵa jáne qala bıliginiń turǵyndarmen aradaǵy keri baılanysyn qamtamasyz etýge múmkindik beredi. Qazirgi ýaqytta Almatynyń Ahýaldyq ortalyǵy qala tirshiliginiń barlyq salasyn qamtıtyn 53 modýlden turady. Derekter 50-den astam uıymnan, sondaı-aq memlekettik jáne qalalyq aqparattyq júıelerden (Ulttyq statısıka búrosynyń saıty, «Qylmystyq quqyq buzýshylyqtar kartasy», «109 qyzmeti», «Biryńǵaı beınemonıtorıng júıesi», «Sergek», «Ońaı», Metropolıten, TJD jáne t.b.) jınalady. Prezıdenttiń tapsyrmasyna sáıkes balalardyń qaýipsizdigine aıryqsha mán beriledi. Byltyr Almatydaǵy barlyq memlekettik mektep pen balabaqshalarda alǵash ret keshendi qaýipsizdik júıeleri engizildi. Memleket basshysyna onyń sıfrlyq beınebaqylaý kameralary, dabyl túımeleri, órtke qarsy qaýipsizdik júıeleri, Face ID qondyrǵysy bar arnaıy týrnıketter sekildi 4 bólikten turatyny jóninde baıandaldy.