Qasym-Jomart Toqaev Birikken Arab Ámirlikterine resmı sapary aıasynda «Abý Dabı turaqty damý aptalyǵy» atty samıttiń ashylý rásimine qatysty.
Sonymen qatar jıynǵa Birikken Arab Ámirlikteriniń Prezıdenti sheıh Muhammed ben Zaıd Ál Nahaıan, Ońtústik Koreıa Prezıdenti Iýn Sok Ól, Ázirbaıjan Prezıdenti Ilham Álıev, Angola Prezıdenti Jýan Lorensý, Mysyr Syrtqy ister mınıstri, BUU Klımattyń ózgerýi jónindegi konferensıasy 27-shi sesıasynyń (SOR27) prezıdenti Samıh Shýkrı, sondaı-aq saıasatkerler, jańartylatyn energıa, tehnologıalyq damý jáne ınovasıa salalarynyń jetekshileri, ınvestorlar men kásipkerler qatysty.
Samıt aıasynda Memleket basshysy Qasym-Jomart Toqaev sóz sóıleıdi dep josparlanyp otyr.
ADSW 2023 – ornyqty damý úderisine halyqaralyq kúsh-jigerdi qoldaýǵa baǵyttalǵan BAÁ jahandyq bastamasy. Abý Dabı samıti – azyq-túlik pen sý resýrsy qaýipsizdigi, energıaǵa qoljetimdilik, ónerkásipti kómirteginen aryltý, densaýlyq saqtaý jáne klımattaǵy ózgeristerge beıimdelý sıaqty aýqymdy ári óte mańyzdy máselelerge arnalǵan bıylǵy alǵashqy halyqaralyq forým.
Jıynnyń maqsaty – jahandyq qoǵamdastyqty biriktiretin jáne túrli máselelerde, jańashyl seriktestik qatynastar men ınovasıalyq sheshimderde kelisimge qol jetkizý úshin konstrýktıvti dıalogqa jol ashatyn ornyqty damý salasynyń kún tártibin qalyptastyrý jáne COP28 konferensıasyna tyń serpin berý.
ADSW 2023 alańynda alǵash ret Jasyl sýtegi samıti ótkiziledi. Onda ekonomıkanyń negizgi sektorlaryn kómirteginen aryltý isinde samıttiń áleýeti aıqyndalady.
«Abý Dabı turaqty damý aptalyǵy» samıtiniń aıasynda Zayed Sustainability Prize syılyǵyn tapsyrý rásimi ótti. Memleket basshysy Qasym-Jomart Toqaev syılyqty Global High Schools nomınasıasy boıynsha (Amerıka aımaǵy) kolýmbıalyq Fundacion Bios Terrae - ICAM Ubate mektebine tabys etti.
Zayed Sustainability Prize – turaqty damý salasyndaǵy orasan zor jetistigi úshin beriletin Birikken Arab Ámirlikteriniń jahandyq syılyǵy. Bul marapat BAÁ Tuńǵysh Prezıdenti marqum sheıh Zaıd ben Sultan Ál Nahaıannyń gýmanıtarlyq murasyna qurmet belgisi retinde 2008 jyly ótken «Bolashaqtyń energıasy» álemdik samıtinde taǵaıyndaldy.