Bul arqyly ýaqyt únemdeledi.
Qazaqstandyqtar Elicense.kz portaly men Otbasy bankiniń qyzmetterin paıdalanǵanda, eGov QR arqyly elektrondy qujattarǵa qol qoıa alady, dep habarlaıdy Almaty-akshamy.kz «Ulttyq aqparattyq tehnologıalar» AQ-na silteme jasap.
eGov QR qujattarǵa qol qoıý prosesin jeńildetedi. QR arqyly qol qoıǵanda kompúterde NCALayer qosymshasyn ornatýdyń qajeti bolmaıdy.
E-lısenzıalaý paıdalanýshylary úshin NCALayer kómegimen qoldanystaǵy elektrondy sıfrlyq qoltańba (ESQ) ádisi de qoljetimdi bolyp qala beredi.
«UAT» AQ basqarma tóraǵasy Rostıslav Konáshkınniń aıtýynsha, memlekettik organdardyń, Otbasy banktiń belsendi qatysýymen eGov Mobile qosymshasynyń paıdalanýshylaryna QR arqyly qol qoıý fýnksıasynyń múmkindigin keńeıtken.
Elicense.kz portalynda jeke tulǵalarǵa QR kodty paıdalaný arqyly qyzmetterge qol qoıýǵa jáne portalda avtorızasıadan ótýge ári Otbasy banktiń qyzmetterin alýǵa múmkindik týdy. Balama ádis kirý men qol qoıýǵa yńǵaıly. Sebebi ol ESQ-ny engizýdi talap etpeıdi jáne qazaqstandyqtardyń ýaqytyn únemdeıdi,- dedi basqarma tóraǵasy.
Otbasy banktiń klıentteri eGov Mobile qosymshasynda eGov QR kómegimen tómendegi qyzmetterge qol qoıa alady:
Otbasybank.kz portalynda jalǵa alýdy sýbsıdıalaý baǵdarlamasyna qatysýǵa ótinim berýde derekterdi jınaýǵa jáne óńdeýge kelisim berý;
Enpf-otbasy.kz platformasynda syrtqy aýdarym operasıalary kezinde qujattarǵa qol qoıý.
Banktiń basqarma tóraǵasynyń orynbasary Elmıra Raspekova eGov QR jańa ádis turǵyndarǵa yńǵaıly bolatynyn atap ótti.
«Bank 2,5 mln qazaqstandyqqa qyzmet kórsetedi. Olarǵa sapaly qyzmet kórsetýge tyrysamyz. Onlaın quraldarǵa basymdyq berip otyrmyz. Endi qashyqtan nesıelik ótinim berýge, qaryz alýǵa, kepil shartyn tirkeı alýǵa, jalǵa berýdi sýbsıdıalaý baǵdarlamasyna qatysýǵa ótinish berýge ári jaldaý shartyna qol qoıý úshin eGov QR-dy paıdalanýǵa bolady. Qazir «UAT» AQ-men birlesip, QR-kodtyń kómegimen qujattarǵa qol qoıý boıynsha jumys isteı bastadyq. Bolashaqta klıentterimiz jańa ádisti kómegimen 40-tan asa qujatqa qol qoıa alady», - dedi ol.