Kúıshiniń ómirden ótkenin keshe habarlaǵanbyz.
Memleket basshysy kúıshi, kompozıtor Ábdimomyn Jeldibaevtyń otbasy men jaqyn týystaryna kóńil aıtý jedelhatyn joldady, dep habarlaıdy Almaty-akshamy.kz Aqordaǵa silteme jasap.
Prezıdent Qasym-Jomart Toqaev dáýlesker kúıshi, kompozıtor, «Parasat», «Qurmet», «Dostyq» ordenderiniń ıegeri Ábdimomyn Jeldibaıulynyń dúnıeden ótýine baılanysty onyń otbasy men jaqyn týystaryna kóńil aıtty.
«Ábdimomyn Jeldibaıuly kıeli kúı óneriniń kókjıegin keńeıtken daryn ıesi, ulaǵatty ustaz boldy. Bar sanaly ǵumyryn tól muramyzdy nasıhattaýǵa arnap, elimizdiń mádenıeti men rýhanıatyn damytýǵa aıryqsha eńbek sińirdi. «Erke sylqym» sıaqty ómirsheń kúılerimen jurtshylyqtyń yqylasyna bólendi. Ónegeli ómir súrip, sońyna mýzykalyq mol mura qaldyrǵan Ábdimomyn Jeldibaıulynyń jarqyn beınesi halqymyzdyń júreginde máńgi saqtalady. Marqumnyń ımany salamat, jany jánnatta bolsyn», dep jazylǵan jedelhattaǵy mátinde.