QR Premer-Mınıstri Álıhan Smaıylov «Atameken» UKP qoldaýymen orta bıznes ókilderimen kezekti kezdesý ótkizdi, dep habarlaıdy Almaty-akshamy.kz.
1 maýsymda ótken sharaǵa Atyraý, Aqtóbe, Batys Qazaqstan, Mańǵystaý jáne Qyzylorda oblystarynyń kásipkerleri qatysty.
Úkimet basshysy sońǵy úsh jylda osy oblystarda 59 myńnan astam bıznes jobasy memlekettik qoldaý sharalarymen qamtylǵanyn atap ótti.
Atap aıtqanda, 1,5 trln teńgege 28 myń jobanyń syıaqy mólsherlemesi sýbsıdıalandy. Onyń ishinde orta bıznestiń jalpy somasy 406 mlrd teńge bolatyn 2,5 myńnan astam jobasy qoldaý tapty.
Sonymen qatar 12 myń sýbektige 487 mlrd teńgege jeńildikpen qarjylandyrý usynyldy, onyń ishinde 102 mlrd teńgege 167 orta bıznes ókilderiniń jobalary qarjylandyryldy.
Kezdesý barysynda kásipkerler balyq salasyn damytýdyń, atap aıtqanda, jabdyqtardy jańartý, ınfraqurylymdy jańǵyrtý, ozyq standarttar engizý jáne ónim eksporty, munaı-gaz mashına jasaý salasyndaǵy ımportty almastyrý, munaı servısin qoldaý, batys óńirlerdiń kólik-logıstıkalyq múmkindikterin keńeıtý, salyq salý jáne basqa da birqatar ózekti máseleni kóterdi.
Premer-Mınıstr búgingi tańda Qazaqstandaǵy ınvestorlar úshin memleketten qoldaý men preferensıalar alýdyń birqatar tetigi jumys isteıtinin atap ótti. Atap aıtqanda, mundaı jeńildikter arnaıy ekonomıkalyq aımaqtardyń qatysýshylaryna jáne ınvestısıalar týraly kelisim aıasynda kózdelgen.
Barlyq kóterilgen másele boıynsha ortalyq memlekettik organdardyń, ulttyq kompanıalardyń, oblys ákimdikteriniń basshylary jaýap berip, problemalyq máselelerdi baqylaýǵa aldy.
Úkimet basshysy óńirlerdiń ákimdikteri ınfraqurylym júrgizý, jer ýchaskelerin bólý jáne olardyń quzyretine kiretin basqa da máseleler boıynsha kórsetiletin qoldaý deńgeıin arttyrýy qajet ekenin aıtty. Óńirlik damý ınstıtýttary da orta bıznespen yntymaqtastyqty keńeıtýi kerek.
«Ár ákimdik alańynda kásipkerlerdiń máselelerin sheshý boıynsha júıeli kezdesýler ótkizý qajet. Bıznes memlekettik basqarýdyń barlyq deńgeıinde qoldaýdy sezinýi kerek», — dedi Álıhan Smaıylov.