QR Premer-mınıstri Oljas Bektenov Qostanaı oblysyna jumys sapary barysynda óńirdiń ónerkásiptik áleýetimen tanysty. Prezıdenttiń Joldaýda aıtylǵan joǵary qaıta óńdeýdi ıgerý jáne lokalızasıa deńgeıin arttyrý jónindegi tapsyrmalarynyń oryndalý barysyn tekserdi, dep habarlaıdy aqshamnews.kz
Premer-mınıstrge bıylǵy 11 aıda Qostanaı oblysynda ónerkásip ónimin óndirý kólemi 2,5 trln teńgege jetkeni, óńdeý ónerkásibiniń úlesi 72%-dan asqany baıandaldy. Osy jyly óńirde quny 124,7 mlrd teńge bolatyn 6 ındýstrıalyq joba iske asyrylyp, 1 301 jumys orny ashyldy.
Caspian Steel QZ usaq surypty ılem óndiretin kásiporynda Oljas Bektenov tehnologıalyq prosespen jáne kompanıanyń bolat daıyndamasyn shyǵarýǵa baǵyttalǵan jańa zaýyt salý jónindegi josparymen tanysty. Jumys istep turǵan kásiporynnyń qýaty jylyna 450 myń tonnany quraıdy. Osylaısha, bıylǵy 10 aıda 311,4 myń tonna bolat ılem jáne 10,9 myń tonna metal synyqtary óndirildi. Zaýyt ónimderi ishki qajettilikterdi ótep, syrtqy naryqqa shyǵarylady. Jyl basynan beri 32 mlrd teńgeden astam somaǵa 112,6 myń tonna usaq surypty ılem eksporttaldy.
Bolat daıyndamalar óndiretin jańa kásiporynnyń boljamdy qýaty jylyna 1 mln tonnany quraıdy. Caspian Group kompanıasynyń dırektory Aleksandr Kım jobaǵa $650 mln ınvestısıa salý josparlanǵanyn aıtty. Zaýyt paıdalanýǵa berilgen kezeńde 600 adamdy jumyspen qamtamasyz etip, merdiger uıymdarda taǵy 400 jumys orny ashylady. Kásiporynda jahandyq «jasyl» ekonomıkaǵa kóshý sheńberinde qorshaǵan ortaǵa áserin barynsha azaıtatyn sońǵy býyndaǵy elektr doǵaly peshterdi paıdalaný josparlanyp otyr. Jobany júzege asyrý shyǵarylatyn túpkilikti ónimdegi otandyq qamtýdy 99%-ǵa deıin arttyra otyryp, armatýralyq ılem óndirisin lokalızasıalaýǵa múmkindik beretini atap ótildi. Sonymen qatar óńirdegi óńdeý ónerkásibiniń úlesi 12,3%-ǵa artady.
Oljas Bektenov ınvestısıalyq jobanyń mańyzdylyǵyna toqtalyp, iri ındýstrıalyq óndirister tóńireginde shaǵyn jáne orta bıznes beldeýin qalyptastyrý qajettigin aıtty.
«Prezıdent Úkimetke ekonomıkalyq ósýdiń jańa kózderin tabý týraly naqty mindet qoıdy. Árbir óńirdiń ózindik kúshti jaqtary bar jáne biz oblystyń, elimizdiń ekonomıkasyna jáne jalpy halyqtyń ál-aýqatyn jaqsartý jumystarynda naqty ósimge qol jetkizetin áleýetti barynsha ashýǵa tyrysamyz. Biz tańdaǵan ekonomıkalyq patrıotızm joly jańa otandyq zaýyttar men óndirister túrinde óz jemisin berýde, olar óz kezeginde aınalasynda taǵy bir SHOB bóligin damytýda. Munyń barlyǵy otandyq ekonomıkanyń ózin-ózi qamtamasyz etýin arttyrýǵa jáne ónimdi jumys oryndaryn qurýǵa múmkindik beredi», — dep atap ótti Premer-mınıstr.
Oljas Bektenov qýaty jylyna 45 myń tonna júk kólikterine arnalǵan shoıyn quımalarynyń negizgi óndirýshisi – KamLitKZ zaýyty bazasynda qara metalýrgıanyń damýymen tanysty. Premer-mınıstrge negizgi tehnologıalyq proses avtokólik bólshekterin óndirýdiń tolyq sıklin qamtıtyny jáne ónimniń halyqaralyq sapa standarttaryna sáıkes kelýin qamtamasyz etetini baıandaldy. 2025 jyly qýatty jylyna 75 myń ónimge deıin jetetin dálme-dál shtamptaýdyń ozyq tehnologıalaryn qoldanatyn ekinshi zaýytty iske qosý josparlanǵan.
Búgingi tańda Qostanaı oblysy mashına jasaý salasy boıynsha respýblıkada kósh bastap tur. Premer-mınıstrge Kia avtokóligin óndiretin zaýyt salynyp jatqan ındýstrıalyq aımaq aýmaǵynda óńirdegi avtomobıl jasaý qarqyny týraly baıandaldy. Jobanyń jalpy quny $200 mln-ǵa baǵalanyp otyr, onyń 80%-ǵa jýyǵy tikeleı sheteldik ınvestısıa. Kásiporyndy iske qosý 2025 jylǵa josparlanǵan, búginde negizgi óndiristik korpýsty salý, irgetasyn qalaý, sondaı-aq metal konstrýksıalaryn montajdaý jumystary aıaqtaldy. Oljas Bektenovke lak-boıaý óndirisin, onyń ishinde polımerli jabyndardyń barlyq túrlerin lokalızasıalaýdyń joǵary deńgeıin qamtamasyz etetin óndiristi qurý josparlar týraly baıandaldy, Zaýyttyń tolyq jobalyq qýaty jylyna 70 myń avtokólikti quraıdy. Kásiporyn ónimderi shaǵyn torapty qurastyrý ádisin qoldana otyryp shyǵarylady. Óndiris 68 robotpen jabdyqtalady. Zaýyt iske qosylǵanda joǵary aqy tólenetin 1,5 myń jańa jumys orny ashylady.
Premer-mınıstr elimizdegi avtomobıl shyǵaratyn jetekshi kásiporyndardyń biri «SaryarqaAvtoProm» kompanıasynyń óndiristik qýatyn qarap shyǵyp, tolyq sıkl boıynsha avtokólikter qurastyrýdyń tehnologıalyq prosesteri erekshelikterimen tanysty. Zaýyttyń bas dırektory Syrym Semeıbaev 2024 jyly shyǵarylatyn ónim kólemin 90 myń avtomobılge jetkizý josparlanyp otyrǵanyn aıtty. Óndiris jelisinde JAC, Kia, Chevrolet, Jetour, Hongqi, Skoda sıaqty brendter usynylǵan.
Zaýytta fızıkalyq jáne sıfrlyq qaýipsizdikti biriktiretin ınovasıalyq platforma sanalatyn biregeı «Jedel áreket etý ortalyǵy» jumys isteıdi. Ortalyqtyń negizgi artyqshylyǵynyń biri – júıeniń ózgeristerge beıimdelýine jáne jańa analıtıkalyq tásilder engizýge múmkindik beretin oqytylatyn jasandy ıntellektini paıdalaný. Bul elimizdegi eńbek ónimdiligin arttyrýǵa jáne qyzmetkerlerge qolaıly eńbek jaǵdaıyn jasaýǵa baǵyttalǵan osyndaı alǵashqy joba. Sonymen qatar avtomobıl zaýytynda lokalızasıany tereńdetý boıynsha jumys júrgizilip jatqany aıtyldy. Indýstrıaldy aımaqta aýdany 30 myń sharshy metr bolatyn Lokalızasıa ortalyǵynyń qurylysy júrgizilýde.
Kásiporynda tehnıkalyq kadrlardy damytýǵa erekshe kóńil bólinedi. Osy maqsatta sehtardyń barlyǵynda mamandandyrylǵan óndiristik oqytý ýchaskeleri uıymdastyryldy: bıylǵy 11 aıda 1,2 myńnan astam maman oqytyldy.
Premer-mınıstr óndiristi keńeıtý bilikti kadrlardy daıarlaý jáne ındýstrıalyq jobalardy iske asyrýǵa jastardy tartý boıynsha qatar júrgiziletin jumystarmen súıemeldenýge tıis ekenine toqtaldy. Kásiptik-tehnıkalyq bilim berý, sondaı-aq WorldSkills Kazakhstan sheberlik chempıonatynyń alańy tıimdi tetik bolyp sanalady. Oljas Bektenov sonymen qatar kásiporyndardyń tıimdiligi men shyǵarylatyn ónim kólemin arttyrýǵa baǵyttalǵan sıfrlyq sheshimderdi óndiristik prosesterge engizýdiń mańyzdylyǵyn atap ótti.
