Fýtboldan 2024 jylǵy Eýropa chempıonatyna irikteý satysynyń altynshy týryndaǵy ekinshi oıyn kúni aıaqtaldy, dep habarlaıdy Almaty-akshamy.kz.
Bul kúni J tobynda Portýgalıa quramasy óz alańynda Lúksembýrg quramasyn qabyldady.
Lúksembýrgtik fýtbolshylar sońǵy jyldarda jaqsy oıyn órnegin kórsetip keledi. Bıylǵy jyly da sol qarqynda joǵary nátıjege qol jetkizip otyr. Qazirge deıin 10 upaı jınap, týrnır kestesinde úshinshi orynda kele jatqan edi.
Biraq búgingi kezdesýde azýly qarsylasyna laıyqty qarsylyq kórsete alǵan joq. Tájirıbeli portýgalıalyqtar Lúksembýrg fýtbolshylaryn oısyrata jeńdi.
Kezdesý barysynda portýgaldyq Gonsalý Inasıý - 12, 45, Gonsalý Ramýsh - 18, 34, Dıogý Jota - 57, 77, Rıkardý Orta - 67, Brýný Fernandesh - 83, Joao Felıks 88-mınýtta mergendik tanytty.
Osylaısha Portýgalıa 9:0 esebimen jeńiske jetti.
Sondaı-aq atalǵan topta Slovakıa Lıhtenshteındi 3:0, Islandıa men Bosnıa jáne Gersogovınany 1:0 esebimen jeńdi.
Al D tobynda óz alańynda Armenıa Horvatıaǵa 0:1, Latvıa Ýelske 0:2 esebimen ese jiberdi.