Polısıa jumyspen qamtý jáne jyljymaıtyn múlik pen avtokólik salasyndaǵy alaıaqtyq úshin buryn ustalǵan alaıaqtar tobyna qatysty qylmystyq is qozǵady, – dep habarlaıdy almaty-akshamy.kz
Mańǵystaý oblysy polısıa departamentiniń uıymdasqan qylmysqa qarsy kúres basqarmasynyń qyzmetkerleri ótken jyly jedel-izdestirý is-sharalaryn júrgizý barysynda alaıaqtyq faktisin anyqtady.
Qaskóıler munaı kompanıalarynyń birine jumysqa ornalastyrý, sondaı-aq avtokólikter men jyljymaıtyn múlikti alyp-satý syltaýymen 112 mln teńgeden astam qarajatty ıemdengen.
– Búginde polısıaǵa respýblıkanyń ár óńirinen 20 adam aryzben júgindi. Ustalǵandardyń turǵylyqty jeri men jumys orny boıynsha tintý júrgizildi. Zattaı dáleldemeler tárkilendi. Qazirgi ýaqytta toptyń úsh múshesi qamaýda. Qajetti tergeý sharalary júrgizilip jatyr. Olar uıymdasqan qylmystyq topty quryp, ony basqardy jáne oǵan qatysty dep aıyptalýda. Tergeý múddesi úshin ózge málimetter jarıa etilmeıdi, – dedi QR İİM uıymdasqan qylmysqa qarsy kúres departamentiniń ókili Qýandyq Alpys.