Bul týraly İİM ákimshilik polısıa komıteti basqarmasy bastyǵynyń orynbasary Dáýren Qozybaqov aıtty.
İs-shara aıasynda 800-ge jýyq atys qarýy men 780-ge jýyq arnaıy qural men oq-dáriler tabylyp, tárkilengen, dep habarlaıdy Almaty-akshamy.kz İnbusiness.kz saıtyna silteme jasap.
Qańtar oqıǵasy kezinde jarıalanǵan tótenshe jaǵdaı alynǵan soń «quqyqtyq tártip» jedel aldyn alý is-sharasy bastaldy.
«Quqyqtyq tártip» jedel aldyn alý is-sharasy barysynda atys qarýy men oq-dárilerdi zańsyz alyp júrgeni jáne saqtaǵany úshin 459 adam ustaldy, 792 atys qarýy men 778 arnaıy quraldar men oq-dáriler tabyldy jáne tárkilendi», - dedi Qozybaqov dúısenbide ótken brıfıńte.
Basqarma bastyǵynyń aıtýynsha, qazir qarýdy óz erkimen tapsyrý aksıasy bolyp jatyr.
«Azamattar óz erkimen 109 qarý tapsyrdy, onyń ishinde 11-i oıyq, 53-i tegis uńǵyly qarý jáne 28 ár túrli qarý bar», - dedi Qozybaqov.
Onyń málimetinshe, jedel aldyn alý sharasy bastalǵannan beri esirtki zattaryn zańsyz saqtaǵany jáne alyp júrgeni úshin 684 adam ustaldy, olardan 263 kg jýyq esirtki, onyń ishinde 545 gramnan astam geroın tabyldy. «Quqyqtyq tártip» jedel aldyn alý sharasy 19 qańtarda bastalǵan, erekshe ókimge deıin jalǵasady.
Qańtarda Jańaózende bastalǵan beıbit mıtıńter ekonomıkalyq jáne saıası talaptarǵa ulasyp, búkil el boıynsha jappaı narazylyq ótti. Keıbir aımaqta ákimshilik ǵımarat, polısıa bólimsheleri, dúkenderge shabýyl bastalǵan. Belgisiz adamdardyń áreketinen Almatyda shyǵyn kóp boldy. Onda jeti qarý-jaraq dúkeni tonalyp, 1,3 myńnan astam qarý-jaraq urlanǵan. Urlanǵan zattyń bir bóligi tabylǵan jáne tárkilengen.