23 maýsym - Qazaqstan polısıasy kúni. Ataýly dataǵa oraı Aqshamnews.kz tilshisi el qaýipsizdigi úshin ómirin qurban etip, erlikpen kóz jumǵan batyr tártip saqshylaryn eske túsirdi.
Balalardy ajaldan arashalap qalǵan serjant Qaırat Jumabekov
2008 jyldyń 20 mamyrynda Qaraǵandy oblysynda bolǵan jol apatynda serjant Qaırat Jumabekov óz ómirin 130 oqýshy úshin qurban etken edi. Almaty – Ekaterınbýrg tas jolynda oqýshylar otyrǵan avtobýsty qyzmettik kólikpen ertip kele jatqan ol, qarsy baǵyttaǵy KAMAZ kóligine óz kóligin tosyp, soqqyny ózine alǵan. Ol apattyń aýyrlyǵynan oqıǵa ornynda qaza tapty.
Bul erlik el esinde máńgi qaldy. 2024 jyly osy umytylmaǵan erlikke arnalyp "Qaırattyń qaıta janǵan juldyzy" atty qysqametrajdy fılm túsirildi.
Aýyl tynyshtyǵyn kúzetken kapıtan Kakabaevtyń erligi
2008 jyldyń 30 shildesinde Pavlodar oblysy, Peschanoe aýylynda polısıa kapıtany Farıd Kakabaev qyzmettik ýaqyttan tys kezde, jeke kóligin jóndep jatyp, aýyldaǵy dúkenge buzaqylardyń qaýip tóndirgenin estıdi. Oqıǵa ornyna jetken polıseı tártip buzýshynyń qashyp ketkenin baıqap, artynan qýady. Qylmysker mektep shatyryna qashyp shyǵyp, aǵash satymen artynan kele jatqan polıseıdiń ústine beton plıtany laqtyryp jibergen. Aýyr jaraqat alǵan Farıd aýrýhanaǵa jetpeı kóz jumdy. Onyń orny tolmas erligi men kásibı adaldyǵy áriptesteriniń jadynda.
Farıd Kakabaev Jańasibir oblysynda týǵan. Áskerden keıin Kachır avtokólik kásipornynda júrgizýshi bolyp istep, keıin ishki ister organdaryna qyzmetke turady. Shymkenttegi İİM arnaıy mektebin, keıin KIPMO-ny bitirip, tergeýshi, kámeletke tolmaǵandar isimen aınalysatyn ınspektor boldy. Áriptesteri ony "sabyrly, jyldam sheshim qabyldaı alatyn, únemi izdeniste júretin kásibı maman edi" dep eske alyp, erligin keıingi býynǵa únemi áńgimelep otyrady.
Antyna adal serjant Aqymǵalıevtiń oqıǵasy
2019 jyldyń 21 naýryzynda Atyraýda bolǵan oqıǵa jurtty dúr silkindirgen edi. Sol kúni "102" nómirine keshki saǵat onǵa taıaý belgisiz áıeldiń kópirden sekirmek bolǵany týraly habarlama kelip túsedi. Atyraýdaǵy polısıa leıtenanty Rústembek Sýndýtov pen polısıa serjanty Shalqar Aqymǵalıev oqıǵa ornyna birden umtylǵan-tyn. Birer mınýttyń ishinde ózenge jedel jetken tártip saqshylary áıeldiń kópirden sekirip, sýǵa batyp bara jatqanyn kóredi. Dál osy kezde Shalqar sýǵa sekirip, ony jaǵaǵa shyǵarmaq bolǵan. Onyń artynsha Rústembek te sýǵa túsedi. Shalqar boıjetkendi qyzmettesine tapsyryp úlgerip, ózi aǵyn sýmen kete barǵan. Osylaısha, jas serjant ózge úshin óz ómirin qurban etti.
Prezıdent Jarlyǵymen Rústembek Sýndýtov İİ dárejeli «Aıbyn» ordenimen marapattalsa, Shalqar Aqymǵalıevqa ómirden ótkennen keıin İİİ dárejeli "Aıbyn" ordeni berildi.
Shalqardyń erligi Erke Esmahannyń "1001 kún" ánine arqaý bolǵan edi.
Qańtar oqıǵasynda polısıa bólimin qorǵap qalǵan qaharmandar
2022 jyldyń 5 qańtarynda atys qarýymen, granatalarmen jáne otty qospasy bar bótelkelermen qarýlanǵan bir top adam Almaty qalasynyń Almaly aýdandyq polısıa bólimine shabýyl jasaǵan. Qaskúnemder ǵımaratty basyp alyp, kezekshi bólimniń qarý-jaraq bólmesindegi qarý-jaraqty ıemdenýdi kózdegen. Shabýylǵa toıtarys berý kezinde aǵa serjant Allen Asylhanov pen polısıa júrgizýshisi Rınat Kambetov qaza tapqan edi.
Olar bólimsheni aman alyp qalyp, áriptesteriniń ómirin saqtap qaldy. 9 qańtarda prezıdent Qasym-Jomart Toqaevtyń jarlyǵymen ekeýi de İİİ dárejeli "Aıbyn" ordenimen marapattaldy.
Jasóspirim qyzdy pedofılden qutqarǵan serjant Ahatov
2024 jyly naýryz aıynda Semeı qalasynda 13 jastaǵy qyz "102" nómirine qońyraý shalyp, ózin belgisiz er adamnyń ańdyp júrgenin habarlaǵan. Habar túsken sátte oqıǵa ornyna birden polısıa qyzmetkerleri attanady. Kelgen tártip saqshylary kúdiktini toqtatpaq bolǵanda, ol qarsylyq kórsetip, polısıa serjanty Asqat Ahatovqa úsh ret pyshaq salyp jaraqattaıdy. Qyzdy qorǵap, qaýipti árekettiń aldyn alǵan Asqattyń batyrlyǵy men kásibı áreketi jasóspirimniń ómirin aman saqtap qaldy. Ókinishke qaraı, Asqat Ahatov sol jyldyń qarasha aıynda jol apatynan qaza tapty.
Bul – polısıa qyzmetkerleriniń beıbit kúndegi maıdany. Olardyń árqaısysy – qaýipke qarsy turǵan qalqan. Erlikpen qaza tapqan batyrlardyń rýhyna bas ıemiz. Polısıa kúni – tek kásibı mereke ǵana emes, el qorǵap jan qıǵan azamattardy eske alatyn kún.