Elordada polısıa qyzmetkerleri er adamnan iri kólemde kokaın tárkiledi
Esirtki qylmysyna qarsy is-qımyl basqarmasynyń qyzmetkerleri Petrov kóshesiniń boıynda Haval avtokóliginiń júrgizýshisin ustady, tintý barysynda onyń kúrtesiniń qaltasynan ishinde untaq tárizdi zaty bar polıetılendi 30 orama tabylyp, tárkilendi.
Kólikti tekserý kezinde tártip saqshylary osyndaı taǵy 76 oramany tapty. 33 jastaǵy er adam ınternet-dúkende esirtkini orap, jınap jáne taratýmen aınalysqanyn moıyndady.
Kúdiktiniń turǵylyqty jerinde qoqys konteıneriniń janynan esirtki zattaryn jasyrǵan oryn anyqtaldy. Úlken sómkeniń ishinen tarazylar, ZipLock qaltashalary, jabysqaq taspa men esirtki tabyldy.
Saraptama nátıjelerine sáıkes tárkilengen esirtki salmaǵy 43,23 gram kokaın, 600 gram mefedron, 100 gram álfa- PVP ekeni anyqtaldy. Atalmysh fakt boıynsha qylmystyq is qozǵaldy.
Ustalǵan azamat ýaqytsha ustaý ızolátoryna qamaldy.