Alaıaqtar qazaqstandyqtardyń jeke derekteri men aqshalaı qarajatyn ıemdený úshin ózderin kýrer, dáriger, túrli qyzmetterdiń qyzmetkerleri dep tanystyratyn jaǵdaılar jıilep ketti.
Polisia.kz saıty alaıaqtyq sqema týraly eskertý jasaýda, dep habarlaıdy aqshamnews.kz Stopfake.kz-ke silteme jasap.
«Eń keń taralǵan alaıaqtyq ádisterdiń biri – azamattarǵa poshta qyzmetiniń kýrerleri, medısınalyq mekemelerdiń dárigerleri nemese energetıkalyq kompanıa qyzmetkerleriniń atynan qońyraý shalý. Sondaı-aq, basqa da túrli mekemelerdiń qyzmetkerleri retinde kórinip, adamdarǵa shuǵyl sheshim qabyldaý qajettiligin uǵyndyrý arqyly aldaýdy maqsat etedi. Mundaı jaǵdaılarda alaıaqtar qyzmet kórsetý prosesin rastaý úshin azamattan 1414 nómirinen kelgen SMS habarlamanyń kodyn jazyp jiberýdi suraıdy. Alaıda bul kod is júzinde jábirlenýshiniń banktik shotyna qol jetkizý úshin qarjylyq operasıalardy rastaýǵa arnalǵan.
Kelesi kezeńde jábirlenýshige «banktiń qaýipsizdik qyzmetkerleri» habarlasyp, bireýdiń onyń atyna nesıe rásimdeýge tyrysyp jatqanyn aıtady. Óz qarajatyn qorǵaý úshin alaıaqtar «qaýipsiz» ádis retinde jábirlenýshige nesıeni ózi rásimdeýdi jáne aqshany arnaıy «qaýipsiz» shotqa aýdarýdy usynady. Nátıjesinde, jábirlenýshi alaıaqtardyń aldyn ala belgisiz shottaryna qarajat aýdarýǵa ıtermelenip, úlken qarjylyq shyǵynǵa ushyraıdy», – deıdi Pavlodar oblysy polısıa departamenti kıberqylmyspen kúres bóliminiń bastyǵy Rızabek Janat.
Polısıa azamattardy qyraǵylyq tanytýǵa shaqyrady: jeke málimetterdi bótenderge bermeńiz, SMS arqyly kelgen kodtardy eshkimge habarlamańyz, kúmándi adamdarmen sóılesýden aýlaq bolyńyz jáne kez kelgen kúdik týyndaǵan jaǵdaıda dereý bankke nemese quqyq qorǵaý organdaryna habarlasyńyz.
«Esińizde bolsyn, bankter men resmı mekemelerdiń qyzmetkerleri Sizden eshqashan kirý kodtaryn talap etpeıdi jáne shuǵyl túrde áreket etýińizdi suramaıdy», – deıdi tártip saqshylary.