Polıseıler otbasyn tekserý úshin dárigerlerge tapsyrdy
Jambyl polıseıleri júkti anany eki balasymen órtten qutqaryp qaldy, dep habarlaıdy Almaty-akshamy.kz Polisia.kz-ke silteme jasap.
14 aqpan kúni Merki APB ÁPb jol-tehnıkalyq ınspeksıasy tobynyń memlekettik avtoınspektorlary Danıar Tnalıev pen Nurdáýlet Nurǵalı Internasıonalnyı kentinde Kókjıek kóshesindegi úılerdiń biriniń terezesinen qalyń tútindi kóredi. Jaqyn barǵanda polıseıler jeke úıdiń tútin men jalynǵa toly ekenin baıqaıdy. Olar jeke qaýipsizdigi týraly bir sát te oılanbastan, ótip bara jatqan adamdarǵa órt sóndirýshiler men jedel járdem brıgadasyn shaqyrýdy aıtyp, ózderi úıge qaraı júgirdi.
«Áriptesim ekeýmiz úıge qaraı júgirgende, áıeldiń daýysy men balanyń jylaǵanyn estidik. Oılanyp turatyn ýaqyt joq edi. Biz terezeni syndyryp, ishke endik. Men qalyń tútindi aralaı bastadym. Eshteńe kórinbedi, balalardyń daýsymen ǵana turǵan jerlerin anyqtaı aldym. Der kezinde qutqara alǵanymyzǵa qýandyq. Biz óz mindetimizge saı árqashan qıyn sátte kómekke kelýge daıyn ekendigimizdi aıtqym keledi», – dedi Danıar Tnalıev.
Sol birneshe sheshýshi mınýttarda eki erjúrek polısıa qyzmetkeri órtenip jatqan úıden eki kishkentaı bala men olardyń júkti anasyn qutqaryp qaldy. Oǵan qosa jedel járdem kelgenge deıin densaýlyqtaryn baqylap, kez kelgen jaǵdaıda qajetti qutqarý sharalaryn ótkizýge daıyn boldy. Kóp uzamaı kelgen órt sóndirý qyzmetiniń qyzmetkerleri órshigen jalyndy sóndirdi.
Polıseıler otbasyn tekserý úshin dárigerlerge tapsyrdy. Sodan keıin ǵana shtattyq rejımdegi óz qyzmetterin ári qaraı jalǵastyrýǵa ketti.