Nú-Iork qalasyndaǵy BUU shtab-páterinde Iadrolyq qarýǵa tyıym salý týraly shartqa qatysýshy memleketterdiń konferensıasy aıasynda Qaraǵandy oblysynyń delegasıasy álemge áıgili sýretshi Káripbek Kúıikovtiń «Polıgon jańǵyryǵy» atty kórmesin usyndy, dep habarlaıdy aqshamnews.kz
Kórme aıasynda Káripbek Kúıikovtiń Semeı ıadrolyq polıgony zardaptarynyń qasiretin beıneleıtin týyndylary men Qaraǵandy oblystyq tarıhı-ólketaný mýzeıiniń qorynan alynǵan fotomaterıaldar kórsetildi. Bul shara arqyly qazaqstandyq delegasıa eldiń tarıhı shyndyǵy men mádenı bolmysyn álemdik qaýymdastyqqa pash etti.
— Bizdiń otanymyzdyń ónerin BUU sıaqty bedeldi halyqaralyq alańda tanystyrý — úlken mártebe. Shyǵarmashylyq pen óner arqyly beıbitshilik pen turaqtylyqtyń mańyzdylyǵy týraly, jahandyq qaýipsizdik úshin árbir adamnyń róli jaıly mańyzdy habar jetkize alamyz dep senemiz, — dedi Qaraǵandy oblysynyń mádenıet, arhıvter jáne qujattama basqarmasynyń basshysy Erkebulan Jumakenov.
Iadrolyq qarýdy taratpaý jónindegi konferensıa — úkimetter, ǵalymdar, belsendiler men azamattyq qoǵam ókilderin biriktiretin jahandyq deńgeıdegi mańyzdy oqıǵa. Osy forým aıasynda uıymdastyrylǵan Kúıikovtiń kórmesi qatysýshylardyń nazaryn tehnıkalyq máselelermen qatar, ıadrolyq qarýdan zardap shekken adamdardyń taǵdyryna, beıbitshilik pen adamzat qaýipsizdigine aýdartty.
Kórme konferensıa kúni boıy ashyq boldy. Kún saıyn 100-den astam kelýshi Káripbektiń eńbekterimen tanysyp, onyń shyǵarmashylyǵyna jáne Qazaqstannyń ıadrolyq qarýǵa qarsy kúrestegi ustanymyna joǵary baǵa berdi.
Káripbek Kúıikov — ıadrolyq qarýsyz álem ıdeıasyn qoldaýshy sımvol. Onyń shyǵarmashylyǵy – bul tek óner emes, bul kúres, úmit pen ómirge qushtarlyqtyń kórinisi. Qazaqstandyq delegasıa osy kórme arqyly elimizdiń beıbitshilik pen turaqtylyqty qoldaıtynyn taǵy bir márte dáleldedi.
Basty maqsatymyz — bolashaq urpaqqa qaýipsiz ári gúldengen álem qaldyrý!