Qyrǵyz Respýblıkasynyń Ulttyq qaýipsizdik memlekettik komıtetiniń tóraǵasy Kamchybek Tashıev jańǵaqty «qyrǵyz jańǵaǵy» dep ataýdy usyndy. Bul týraly Otkýrbek Rahmanov Facebook paraqshasynda jarıalaǵan vıdeoda aıtylǵan, dep habarlaıdy aqshamnews.kz
Beınejazbadan kóringendeı, bul sózder Jalal-Abad oblysynda kóshet otyrǵyzý kezinde aıtylǵan.
«Myńdaǵan jyldan beri bizdiń óńirde jańǵaq ósip keledi. Álem boıynsha eń úlken jańǵaq alqaby Arslanbobta ornalasqan. Bul tek Qyrǵyzstan boıynsha emes, búkil Ortalyq Azıada, tipti basqa qurlyqtarda da mundaı alqap joq. Jer betinde mundaı úlken jańǵaq ormany joq. Biz osyndaı erekshe jerde ómir súrip jatyrmyz. Álemge jańǵaq dál osy Qyrǵyzstannan taralǵan. Keıin ony grek jańǵaǵy, túrik jańǵaǵy, ıspan, vengr jańǵaǵy dep atap ketken. Biraq shyn máninde ol Qyrǵyzstannan shyqqan. Sondyqtan biz ony grek jańǵaǵy emes, qyrǵyz jańǵaǵy dep ataýymyz kerek», – dedi Tashıev.
Buǵan deıin habarlanǵandaı, Kamchybek Tashıevtiń bastamasymen Jalal-Abad oblysynda 100 gektar bos jerge 40 myń kóshet otyrǵyzý bastalǵan. Qyrǵyzstannyń Tótenshe jaǵdaılar mınıstrligi bul aýmaqqa jańǵaqtan bólek, fıstashka, badam, alma, qaraǵaı, órik, sondaı-aq qylqan japyraqty jáne jalpaq japyraqty aǵash túrleri otyrǵyzylatynyn naqtylaǵan.
Aldyńǵy jyldary Qyrǵyzstannyń Qorshaǵan ortany qorǵaý jáne orman sharýashylyǵy agenttigi qyrǵyz jańǵaǵynyń brendin qalyptastyrý jumystaryn júrgizip jatqanyn habarlaǵan. Onda eshbir elde Qyrǵyzstandaǵydaı jabaıy jańǵaqtar óspeıtini aıtylǵan. Agenttik málimetinshe, jańǵaq ormandarynyń jalpy aýmaǵy 45 myń gektardy quraıdy. Al open.kg saıtynyń dereginshe, Arslanbob ańǵarynda ǵana jańǵaq ormandary 600 myń gektardan astam aýmaqty alyp jatyr.