Bul aqparatty sottyń baspasóz qyzmeti rastap otyr.
Nur-Sultan qalasynyń tergeý soty QR Ekologıa, geologıa jáne tabıǵı resýrstar vıse-mınıstri Ahmetjan Pirimqulov pen «ÓKM Operatory» JSHS-nyń burynǵy basqarma tóraǵasy Medet Qumarǵalıevti eki aıǵa qamaýǵa aldy, dep habarlaıdy Almaty-akshamy.kz QazAqparatqa silteme jasap.
Bul aqparatty elorda sotynyń baspasóz qyzmeti rastady.
«2022 jylǵy 27 qańtarda Nur-Sultan qalasynyń mamandandyrylǵan aýdanaralyq tergeý soty kúdiktiler A.A.Pirimqulov pen M.K.Qurmanǵalıevke qatysty 2 aı merzimge kúzetpen ustaý túrindegi bultartpaý sharasyn sanksıalady. QR Qylmystyq prosestik kodeksiniń 201-babyna sáıkes, sotqa deıingi tergep-tekserýdiń basqa derekterin jarıa etýge jol berilmeıdi», - dep jazylǵan málimette.
Eske salsaq, 26 qańtarda QR Ekologıa, geologıa jáne tabıǵı resýrstar vıse-mınıstri Ahmetjan Pirimqulov pen «ÓKM Operatory» JSHS Basqarma tóraǵasy Medet Qumarǵalıev ustalǵan bolatyn.
Sol kúni «ÓKM Operator» JSHS-niń basqarýshy dırektory Rýslan Shámshıevtiń múrdesi tabylyp, elordanyń «Esil» aýdandyq polısıa bólimi QR Qylmystyq kodeksiniń 105-babymen (Ózin-ózi óltirýge deıin jetkizý) qylmystyq is qozǵady.
Aıta keteıik, 2022 jylǵy 11 qańtarda Qazaqstan Respýblıkasy Parlamenti Májilisiniń otyrysynda sóılegen sózinde Memleket basshysy Qasym-Jomart Toqaev «ÓKM Operatory» JSHS-niń kádege jaratý alymyn júrgizý jáne kádege jaratý alymyna ıelik etýin toqtatý týraly tapsyrma berdi.