Zertteý 5-11 jas aralyǵyndaǵy 2 250 balaǵa júrgizildi
«Pfizer-BioNTech» vaksınasy 5-11 jas aralyǵyndaǵy balalarǵa 90,7% tıimdiligin rastady. Bul týraly juma kúni Pfizer kompanıasy málimdedi, dep habarlaıdy Almaty-akshamy.kz QazAqparatqa silteme jasap.
Farmakologıalyq kompanıa AQSH-ta atalǵan jas sanatyna vaksınany jedel qoldanýǵa ruqsat alý úshin ótinim jiberdi. Ol AQSH-tyń Dári-dármek jónindegi federaldy agenttiginiń saıtynda jarıalanǵan.
Pfizer derekterine saı, ekinshi dozadan keıin kem degende jeti kún ótkennen keıin vırýstyń sımptomdyq formalaryna qarsy vaksınanyń tıimdiligi 90,7 % kórsetti. Zertteý 5-11 jas aralyǵyndaǵy 2 250 balaǵa júrgizildi. Olardyń 1 500-i vaksına, al 750-i plasebo aldy.
Pfizer kompanıasy vaksınalaýdan keıin aýyr aýrý túrleri men mýltı qabyný sındromy nemese mıokard jaǵdaılary tirkelgemegenin habarlady.
Balalarǵa arnalǵan dozanyń mólsheri – 10 mıkrogram. Eresekterge 30 mıkrogramm salynady.
Bir aı buryn Pfizer vaksınanyń 5-11 jastaǵy balalarǵa qaýipsiz jáne tıimdi ekenin málimdegen, alaıda onyń dálelderi bolmaǵan.
Vaksınalar boıynsha ishki sarapshylardan turatyn AQSH-tyń dári-dármek jónindegi federaldy agenttiginiń keńes berý komıteti 26 qazan kúni Pfizer ótinimin qarastyrý boıynsha kezekti otyrys ótkizedi.
AQSH-tyń densýlyq saqtaý organdary 5-11 jas aralyǵyndaǵy balalarǵa Pfizer vaksınanyn egýge ruqsat etse, balalardy vaksınalaý naýqany qarashanyń basynda bastalyp ketpek. AQSH bıligi osy aptanyń basynda el boıynsha vaksınanyń mıllıondaǵan dozasyn halyq arasynda bólýdi tezdetetinin málimdegen.
Eýropa dári-dármek agenttigi osy aptada bes jastan asqan balalarǵa koronavırýsqa qarsy Pfizer/BioNTech vaksınasyn egýdi keńeıtý boıynsha ótinimdi qarastyra bastady.
Belgıanyń vaksınalaý boıynsha maqsatty tobynyń ókili eldiń Eýropa dári-dármek agenttiginiń baǵasyna sáıkes 12 jasqa deıingi balalardy vaksınalaý boıynsha sheshim qabyldaıtynyn aıtty.
Qazirgi kezde vaksınalaý sertıfıkaty Green Pass Eýroodaq elderiniń kóbinde 12 jastan asqan azamattardan qoǵamdyq sharalarǵa, dámhanalar men meıramhanalarǵa barǵan kezde suralady.