Qaýipti «oljany» polıseılerge tapsyrdy
Soltústik Qazaqstan oblysynda ózennen balyq aýlaımyn dep, qarmaǵyna myltyq iliktirgen turǵyn qarýdy polısıaǵa tapsyrdy. Tártip saqshylary onyń bul áreketin oń baǵalady, dep habarlaıdy Almaty-akshamy.kz QazAqparat-qa silteme jasap. SQO polısıa departamenti baspasóz qyzmetiniń málimetinshe, petropavldyq balyqshynyń qarmaǵyna erekshe «olja» túsken. Maýsym aıynyń sońynda qalanyń 26 jastaǵy turǵyny Borkı kentinde Esil ózeninen balyq aýlaýǵa barady. Aıtýynsha, qarmaǵyna bir aýyr nárse ilikken. Ol myltyq bolyp shyǵypty. Bul týraly jigit «102» nómirine habarlap, qaýipti «oljany» polıseılerge tapsyrady.
«Jigittiń qarýdy taýyp alǵannan keıin birden polısıaǵa habarlaǵany durys boldy. Tirkelmegen qarýdy saqtaýǵa tyıym salynǵany týraly esterińizge salamyz. Qarýdy ishki ister organdaryna óz erkimen tapsyrý, tapsyrǵan adamnyń áreketinde basqa qylmystyq quram bolmaǵan jaǵdaıda, zańsyz saqtaǵany úshin jaýapkershilikten bosatady», - deıdi SQO PD Ákimshilik polısıa basqarmasy bastyǵynyń mindetin atqarýshy Erlan Mádıev.
Al, tabylǵan myltyq saraptamaǵa jiberildi. Nátıjesinde, onyń tirkelmegen 12 kalıbrli qos uńǵyly «TOZ-34» ańshy myltyǵy ekeni anyqtaldy. Zertteý aıaqtalǵan soń, qarý joıylady. Jyl basynan beri SQO-da turǵyndar óz erkimen tirkelmegen 9 qarýdy tapsyrǵan. Polısıa qyzmetkerleri tirkelgen qarýdyń durys saqtalýyn qadaǵalap, sonymen qatar zańsyz saqtalǵan qarýdy alý boıynsha jumystar júrgizedi. Jalpy oblysta qańtar aıynan beri zańsyz aınalymnan 53 qarý alynǵan.