Búgin QR Aqparat jáne qoǵamdyq damý mınıstri Darhan Qydyráli elimizde petısıany berý tártibin túsindirdi, dep habarlaıdy Almaty-akshamy.kz.
Májilistiń jalpy otyrysynda «Qoǵamdyq baqylaý týraly» zań jobasy men qoǵamdyq baqylaý júrgizý tártibin retteıtin ilespe qujat birinshi oqylymda qaralyp jatyr.
«Zań jobasy petısıa ınstıtýtyn reglamentteý, sondaı-aq aqparatqa qol jetkizý salasyndaǵy zańnamany jetildirý jónindegi túzetýlerdi de qamtıdy. Birinshiden, zańnamada petısıa uǵymy beriledi (petısıa – memlekettik organǵa, jergilikti ókildi jáne atqarýshy organǵa elektrondyq formatta jiberilgen jáne QR Ákimshilik rásimdik-prosestik Kodeksiniń 12-1-taraýynda belgilengen tártippen qaralatyn ujymdyq habarlama, ún qosý nemese usynys). Ekinshiden, Ákimshilik rásimdik-prosestik kodekste petısıalardy berý jáne qaraý tártibi bekitilgen. Úshinshiden, petısıany Qazaqstan Respýblıkasynyń azamattary arnaıy ınternet-portal arqyly bere alady. Tórtinshiden, ýákiletti organ petısıa jarıa bolǵansha zańda bekitilgen sharttarǵa sáıkestigin anyqtaıdy», - dedi D. Qydyráli.
Onyń aıtýynsha, petısıa berilgen kúnnen bastap 20 jumys kúni ishinde oǵan keminde elimizdiń 150 azamatynyń qosylýy qajet. Bundaı tájirıbe petısıa ınstıtýty qurylǵan birqatar elde (AQSH, Ózbekstan jáne t.b.) qoldanylady.
Petısıany mindetti túrde qaraý úshin ony qoldaıtyn daýystardyń shekti mánderi bar:
- aýdandyq deńgeı (ákimdikter) halqy 50 myńnan asatyn bolsa, 2,5 myń daýys, qalǵandary úshin halyq sanynyń keminde 5 %-y bolýy kerek.
- aýdandyq deńgeı (máslıhattar) – halqy 50 myńnan asatyn bolsa, 5 myń daýys, qalǵandary úshin halyq sanynyń keminde 10 %-y;
- oblystyq deńgeı (ákimdikter) – tıisti ákimshilik-aýmaqtyq birliktiń turǵyndarynyń 1% daýysy;
- oblystyq deńgeı (máslıhattar) – tıisti ákimshilik-aýmaqtyq birlik halqynyń keminde 2 %-y;
- respýblıkalyq deńgeı (Úkimet) – keminde 50 myń daýys.
«Petısıany qaraý barysynda memlekettik organ petısıa avtoryn shaqyryp, habardar ete otyryp, memlekettik organ sheshiminiń jobasyn jarıa talqylaýdy uıymdastyryp, jeke komısıa nemese jumys tobyn qurady. Mundaı sharalar petısıalardyń qoǵamdyq mártebesi men mańyzyn arttyrýǵa múmkindik beredi. Petısıa boıynsha sheshimdi memlekettik organnyń birinshi basshysy ǵana qabyldaıdy», - dedi vedomstvo basshysy.
Budan bólek, máslıhat depýtattaryna petısıany ilgeriletý kezeńinde qol jınaýǵa qatysý, memlekettik organdardyń petısıalardy qaraýyna monıtorıń júrgizý, petısıalardy qaraý boıynsha óz okrýginiń saılaýshylaryn habardar etý jáne basqa da ókilettikter berý úshin «Jergilikti memlekettik basqarý jáne ózin-ózi basqarý týraly» zańǵa ózgerister engizý usynylyp otyr.