Ózbekstan Premer-Mınıstriniń orynbasary - Energetıka mınıstri Jýrabek Mırzamahmýdov eldegi elektr qýatynda aqaý bar ekenin aıtty.
Mınıstr qazirgi aýa raıy jaǵdaıynda aýyr zardaptardyń aldyn alý úshin elektr qýatyn josparly túrde óshirý qajet dep esepteıdi, dep habarlaıdy Almaty-akshamy.kz inbusiness.kz saıtyna silteme jasap.
"Bizdiń mindetimiz – turǵyndardyń úıin gazben qamtamasyz etý, sonymen qatar tabıǵı gazdy paıdalana otyryp, jylý elektr stansıalarynda elektr qýatyn óndirý jáne elektr qýatymen qamtamasyz etý. Iá, qarsy bolyp jatqandar bar. Jaryq pen gaz bárine birdeı jetpeı otyr, jıi óship qalyp jatyr. Biz muny moıyndaımyz, eshkim joqqa shyǵarmaıdy", - dep málimdedi Jurabek Mırzamahmýdov.
Birer kún buryn Tashkent ákimdigi qolda bar gaz qoryn barlyq tutynýshylar arasynda birkelki bólýge tyrysyp jatqanyn, biraq janarmaı jetkiliksiz ekenin habarlady. Osy sebepti qoǵamdyq kólikterden basqa barlyq kólikterge gaz quıý beketteriniń jumysyn toqtatý týraly sheshim qabyldandy.