27 naýryz kúni Almatyda Qazaq ulttyq qyzdar pedagogıkalyq ýnıversıtetinde «Pedagogıkalyq ýnıversıtet pen aýyl mektepteriniń yntymaqtastyǵy: máseleleri men sheshý joldary» taqyrybynda konferensıa ótti, dep habarlaıdy almaty-akshamy.kz.
«Aýyldyq mektep shamy» jobasynyń aıasynda uıymdastyrylǵan sharaǵa aýyl muǵalimderi men bilim salasy sarapshylary qatysty. Ashylý saltanatynda ýnıversıtettiń basqarma tóraǵasy – rektor Qanaı Gúlmıra, Almatydaǵy IýNESKO Óńirlik ókildiginiń bas mamany Alpysbaeva Meıirgúl, TeachersLab dırektory Zeınolla Sáýle jáne Aul.Inspired seriktestik jáne syrtqy komýnıkasıalar bóliminiń dırektory Isenova Dınara sóz sóıledi. Spıkerler aýyldaǵy bilim berý ortasyn jaqsartý boıynsha belsendi jumys júrgizýge shaqyryp, ózekti máseleler men yntymaqtastyq perspektıvalaryn talqylady.
Paneldik sesıalar men poster sesıalarynda ustazdar kóshbasshylyq tujyrymdamasy aıasynda tańdalǵan máselelerdi sheshýge baǵyttalǵan jobalaryn usyndy. Sesıalar barysynda aýyl mektepterindegi oqý-tárbıe úderisin jaqsartý jáne bilim sapasyn arttyrý boıynsha syndarly sheshimder men ıdeıalar usynyldy.
Qonaev qalasy №5 orta mektebiniń qazaq tili men ádebıeti páni muǵalimi Tursynbıbi Qarasartova konferensıa ustazdar úshin alǵa jeteleıtin serpilis bolǵanyn aıtty.
«Eń bastysy, konferensıaǵa óz isine berilgen, tájirıbesimen bólisýge daıyn, áreket jasaýǵa umtylatyn naǵyz kóshbasshylar jınaldy. Bizdiń mekteptiń jobaǵa qatysýshylary ýnıversıtetpen yntymaqtastyq boıynsha praktıkant-stýdentterdi mektepke is-tájirıbeden ótýge shaqyrý, olımpıadaǵa júıeli daıyndyqta kómek kórsetý, birlesken jobalarǵa qatysý sıaqty usynystaryn aıtty. Kezdesýden jańa ıdeıalar aldyq, tájirıbe almastyq, oqýshylardy eńbekke úıretý tárbıesi, oqý, jazý, komýnıkasıalyq saýattylyq sıaqty taqyryptar boıynsha qundy aqparattar aldyq. Sondaı-aq aǵylshyn tilin úıretetin jobaǵa qatysýǵa nıet bildirdik. Shara kásibı bilimniń damýyna yqpal etti jáne ózara synı dostyq ornady. Jobaǵa qatysýshylar óz máselelerimen bóliskende QyzPU oqytýshy-ǵalymdary qatysyp, usynys-pikirlerin aıtyp otyrdy, suraqtarǵa jaýap berdi. Bul kezdesýdiń utymdy jaqtarynyń biri boldy. Ýnıversıtet rektory Gúlmıra Qanaı kezdesýdiń basynan aıaǵyna deıin bizben birge bolyp, tyń usynystaryn aıtqany muǵalimderdi yntalandyrdy», – dep atap ótti ustaz.
Konferensıa ustazdardyń kóshbasshylyǵy tujyrymdamasy aıasynda aýyldyq jerlerdegi balalarǵa sapaly bilim berý jáne jalpy máselelerdi sheshýde pedagogıkalyq joǵary oqý oryndary men aýyl mektepteri arasyndaǵy yntymaqtastyqtyń mańyzdylyǵy men bolashaǵyn kórsetti.
