Bıyl sáýir aıynda bastalǵan «Pedagogıkalyq ıdeıalar panoramasy-2024» respýblıkalyq baıqaýynyń óńirlik kezeńi bastaldy.
Elimizdiń barlyq óńirinen baıqaýǵa qatysý úshin 170 ótinish kelip túsken. Olardyń ishinde pán muǵalimderi, bastaýysh synyp pen mektepke deıingi bilim berý uıymdarynyń pedagogteri bar, dep habarlaıdy Almaty-akshamy.kz Oqý-aǵartý mınıstrligine silteme jasap.
Baıqaýdyń maqsaty – elimizdiń vırtýaldy bilim berý keńistigindegi avtorlyq quqyqpen qorǵalǵan beıneresýrstar bankin tolyqtyrý, zamanaýı pedagogıkalyq tájirıbe men muǵalimder arasyndaǵy ózara árekettestiktiń ozyq tájirıbelerin taratý jáne nasıhattaý.
Konkýrstyń baǵyttary: erte saýattylyq (mektepke deıingi tárbıe jáne oqytý), oqý saýattylyǵy, matematıkalyq saýattylyq, jaratylystaný-ǵylymı saýattylyq, sıfrlyq saýattylyq, medıa-aqparattyq saýattylyq, qarjylyq saýattylyq, ekologıalyq saýattylyq, densaýlyq saqtaý saýattylyǵy (medısınalyq saýattylyq), áleýmettik-emosıonaldy saýattylyq, mádenıetaralyq saýattylyq jáne azamattyq-quqyqtyq saýattylyq.
«Pedagogıkalyq ıdeıalar panoramasy» respýblıkalyq baıqaýy pedagogter arasynda óte tanymal. Beınematerıaldardy baǵalaý úshin ár oblysta óńirlik saraptamalyq keńester quryldy, olar ár baǵyt boıynsha júldegerlerdi anyqtaıdy. Birinshi oryn alǵan pedagogterdiń jumystary YouTube-tegi ÓRLEÝ bilim berý arnasynda jarıalanady. Osylaısha, úzdik pedagogıkalyq tájirıbeler barlyǵyna qoljetimdi bolady», – deıdi Oqý-aǵartý mınıstrligi «Órleý» Biliktilikti arttyrý ulttyq ortalyǵynyń basqarma tóraǵasy Aıdana Shılıbekova.
Óńirlik jáne respýblıkalyq kezeńderdiń barlyq qatysýshylary jáne jeńimpazdary sertıfıkattarmen, 1, 2, 3 dárejeli dıplomdarmen marapattalady. YouTube-te eń kóp qaralǵan beınematerıal úshin ár baǵyt boıynsha yntalandyrý sertıfıkaty beriledi. Konkýrstyń barlyq marapattaý qujattary Qazaqstan Respýblıkasy Oqý-aǵartý mınıstriniń 2024 jylǵy 2 sáýirdegi №72 buıryǵyna sáıkes biliktilik sanatyn taǵaıyndaý nemese rastaý úshin attestasıadan ótý kezinde eskeriledi.
Konkýrstyń erejesimen tanysyp, óńirlik kezeńge qatysý úshin ótinimdi 15 qazanǵa deıin https://ppi.orleu-edu.kz saıtynda berýge bolady. Qosymsha aqparat alý úshin «Órleý» biliktilikti arttyrý ulttyq ortalyǵynyń oblystyq jáne Shymkent, Almaty, Astana qalalarynyń fılıaldaryna habarlasyńyz.