Barlyq ýchaskelik polısıa ınspektorlary qyzmettik akkaýnt ashady
KKO-nyń kezekti otyrysynyń kún tártibine shyǵarylǵan jalǵyz másele – ýchaskelik pýnktteri men stasıonarlyq posttardyń jumysyn uıymdastyrý, dep habarlaıdy Almaty-akshamy.kz.
«Elbasynyń tapsyrmasyn oryndaý úshin Ákimdikpen birlesip, ýchaskelik polısıa ınspektorlarynyń qyzmetin jetildirýdiń úsh jyldyq josparyn jasadyq. Olar ózderi qyzmet kórsetetin ákimshilik aýmaqta turatyn bolady – bul birinshi kezekte turǵyndar úshin qolaıly jáne, árıne, polısıa qyzmetkeriniń jumysynyń tıimdiligine oń áser etedi. İİO júıesinde ýchaskelik polısıa ınspektorlary kóp fýnksıonaldy polısıa qyzmetin kórsetedi. Olar quqyq buzýshylyqtar men qylmystardyń aldyn alýda, turǵyn úı aýdandary men eldi mekenderde qoǵamdyq tártip pen qaýipsizdikti qamtamasyz etýde basty tulǵa bolyp tabylady. Olardyń qyzmeti halyqpen tikeleı baılanysta júzege asyrylady. Olar óz mindetterin oryndaı otyryp, ishki ister organdary týraly qoǵamdyq pikirdiń qalyptasýyna aıtarlyqtaı áser etedi, sonymen qatar, azamattardyń polısıaǵa senim deńgeıi olardyń jumysynyń sapasy men tıimdiligine tikeleı baılanysty», - Almaty qalasy PD-niń basshysy Qanat Taımerdenov.
Osyǵan oraı, spıkerdiń aıtýynsha, ýchaskelik polısıa ınspektorlarynyń turǵyndarmen kúndelikti baılanysyna qol jetkizý sharalary júrgizilýde. Mundaı talaptar, ásirese, ýchaskelik polısıa ınspektorlarynyń halyq aldyndaǵy esepteri zańnamalyq deńgeıde bekitilgen jaǵdaıda ózekti bolyp tabylady.
«Sondaı-aq, ýchaskelik polısıa ınspektorlarynyń aqparattyq-kommýnıkasıalyq alańdar arqyly halyqpen ózara árekettesý tájirıbesi jalǵasýda. Búginde áleýmettik jelide 170 ýchaskelik polısıa qyzmetkeri bar. Olardyń árqaısysynda orta eseppen 4 myń jazylýshy bar. Sonymen qatar, ÝPI jalpy úı chattaryna qosylǵan, olar PIK jáne OSI-men tyǵyz árekettesedi. Qazirgi ýaqytta PD basshylyǵynyń nusqaýymen barlyq ýchaskelik polısıa ınspektorlaryna qyzmettik akkaýnttar ashý jumystary júrgizilýde», - dedi, Almaty qalalyq PD Jergilikti polısıa qyzmeti Basqarmasy bastyǵynyń orynbasary, polısıa podpolkovnıgi Dıas Dýanbekov.