Almaty – álem almalarynyń otany
Qazaqstan halqynyń birligi kúni qarsańynda Almaty ákimi Alma Qala ekologıalyq aksıasyna qatysty, onyń aıasynda Túrksib aýdanynyń turǵyndary, kásipkerler men qoǵam qaıratkerleri «Balalar» saıabaǵynda 450 aǵash otyrǵyzdy, dep habarlaıdy Almaty-akshamy.kz.
Otyrǵyzylǵan aǵashtardyń ishinde-túrli suryptaǵy 370 alma aǵashy, sonyń ishinde «Sıvers», «Aport», «Zolotoe prekrasnoe» boldy. «Sıvers» sorty qazirgi zamanǵy alma sorttarynyń negizin qalaýshy bolyp sanalady. Olar qurǵaqshylyqqa jáne sýyqqa tózimdi. Sonymen qatar, saıabaq qaıyńdarmen, japyraqty jáne qylqan japyraqty kóshettermen tolyqtyryldy.
Ekologıalyq belsendilerdiń aıtýynsha, qalanyń saıabaqtary men gúlzarlaryn kógaldandyrý Almaty qalasyna jasyl qala mártebesin qaıtarýǵa baǵyttalǵan.
«Men ekologıalyq volonterlik qozǵalystardyń qyzmetine únemi úlken qurmetpen qaraımyn, olardyń maqsaty - qorshaǵan ortany jaıly jáne saý etý. Búgin osy qoǵamdastyqtyń bir múshesine aınalǵanyma qýanyshtymyn», - dedi Erbolat Dosaev.
Sondaı-aq, ol ekologıalyq aksıaǵa qatysýshylardy kele jatqan merekelerimen quttyqtap, olardyń ıgi mısıalaryna tabys tiledi.
Alma Qala qoǵamdyq bastamasy «Almaty – álem almalarynyń otany» uranymen 2014 jyldan beri jumys isteıdi. Volonterler Almatydan ózge elimizdiń iri qalalary - Nur-Sultan men Shymkentte «Sıvers» sortynyń alma aǵashtaryn otyrǵyzýmen aınalysady. Bastama qolǵa alynǵaly beri tek Almatynyń ózinde ǵana belsendiler 100 myńǵa jýyq aǵash otyrǵyzdy. Jyl basynan beri Almatynyń Túrksib aýdanynda 2 myń kóshet, onyń 850-i alma aǵashtary otyrǵyzyldy.