Pavlodar qalasyndaǵy №26 mektepte matematıka pániniń muǵalimi 15 jastaǵy oqýshynyń arqasyna ıne shanshyp, úlken janjal týdyrdy. Bul oqıǵa sabaq ústinde, oqýshy taqtada jaýap berip turǵan kezde bolǵan, dep habarlaıdy Aqshamnews.kz
Zardap shekken oqýshynyń ápkesiniń aıtýynsha, onyń inisi tártipti, oqý úlgerimi jaqsy bala. Al 23 jastaǵy muǵalim óz áreketin túsindire almaǵan.
«Ol bizge bul qylyǵyn túsinbeıtinin aıtty. Eger ıne arqyly aýrý juqsa she? Endi bizge úsh aı boıy tekserilip turý kerektigin eskertti. Bul óte qorqynyshty», – deıdi ápkesi.
Onyń aıtýynsha, mekteptiń bedeli burynnan nashar. Ata-analar mekemedegi tártipsizdik pen muǵalimderdiń áreketine jıi shaǵymdanatyn kórinedi.
«Bul muǵalim oqýshylarǵa fızıkalyq qysym kórsetip, olardyń shashynan ustap, kemsitetin sózder aıtatyn», – deıdi ol.
Mektep dırektory Gúlmıra Nıazbekova muǵalimniń jumystan bosatylǵanyn habarlady. Biraq oqýshyǵa shabýyl jasaýǵa qoldanylǵan ıneniń qaıda ekeni belgisiz. Qazirgi ýaqytta polısıa tergeý júrgizip jatyr.