Almaty qalasy men oblysynyń patrúldik polısıa ınspektorlary para aldy degen kúdikke ilindi.
Bul týraly Sybaılas jemqorlyqqa qarsy is-qımyl agenttigi málimdegen, dep habarlaıdy Almaty-akshamy.kz.
Almaty oblysy boıynsha Cybaılas jemqorlyqqa qarsy qyzmet Almaty qalasy men Almaty oblysy boıynsha patrúldik polısıanyń 7 qyzmetkerine qatysty sotqa deıingi tergeýdi aıaqtady.
«Olar birneshe ret para aldy dep kúdikke ilindi. Polıseıler jol qozǵalysy erejelerin buzǵan azamattardy ákimshilik jaýapkershilikke tartpaǵany úshin zańsyz aqshalaı syıaqy alǵan. Sonymen qatar ınspektorlar joldarda is júzinde quqyq buzýshylyq jasamaǵan azamattardyń aqshasyn alaıaqtyq jolmen ıemdengen», - dep jazylǵan habarlamada.
Qazirgi ýaqytta qylmystyq istiń materıaldary sotqa joldandy.
«Qylmystyq prosestik kodeksiniń 201-babyna sáıkes tergeý múddesine oraı ózge aqparat jarıa etýge jatpaıdy. Sonymen birge, Konstıtýsıanyń 77-baby 3-tarmaǵynyń 1-tarmaqshasyna jáne Qylmystyq-prosestik Kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi», - dep jazylǵan habarlamada.