Alergıa kezeńi bastalǵaly dertke shaldyqqandar sany kóbeıgen.
Kún jylyǵaly, maýsymdyq alergıa derti órshı tústi. Dárisiz júre almaıtyndar da kóbeıgen, dep habarlaıdy Almaty-akshamy.kz.
Alergıa derti mazasyn qashyrǵan jandardyń biri - Qyrmyzy Zaryqhanova. Óziniń aıtýynsha, bul der órshigen kezde uıqy qashyp, ózin jaısyz sezinedi eken.
«Osy kezderde maǵan kóshede shyǵyp júrý óte qıynǵa soǵady. Kóshege bir shyǵyp kelgennen keıin de túnimen uıyqtaý degen sekildi úlken másele týyndatady. Sebebi, bylaı aıtqanda, eshqandaı dárisiz, preparattarsyz júre almaımyn, ózimdi jaqsy sezine almaımyn», - deıdi stýdent Qyrmyzy Zaryqhanova.
Mamandardyń aıtýynsha, alergıa tuqym qýalaıdy. 70% jaǵdaıda qan arqyly taraıdy. Biraq bul dert ımýnıteti tolyq qalyptaspaǵan adamdardan da anyqtalyp jatady. Ásirese bala kezde antıbıotıktik dárilerdi shamadan tys tutyný eseıgende osy alergıaǵa ákeledi.
«Pollınoz birneshe sındromǵa bólinedi. Rınokonúktıvaldy sındrom kózdiń qyshýy men tynys alý joldarynyń bitelýi sıaqty belgiler arqyly júredi. Túshkirý, muryn bitelý – barlyq sındromnyń ishindegi eń qaýipsizi. Al bronhıaldy obstrýksıa – alergıanyń eń qaýipti túri. Ol kezde tynys alý nasharlaıdy», - deıdi alergolog Rozenson Rafaıl.
Alergıany qozdyratyn faktor kóp. Biz tutynatyn taǵamdar men kókenisterdiń de keri áseri bar. Sondyqtan dıetolog ımýndyq dertke arnalǵan gıpoallergendi dıeta ustaýǵa keńes beredi.
«Tamaqtar jaıly aıtatyn bolsaq, ol qyzyl tústi, toqsary tústi, sary tústi kóp tutynbaýǵa keńes beremin. Sodan keıin sýsyndardyń ishinde quramynda qanty kóp boıaýyshtar, konservanttar bar, energetıkalyq sýsyndar, mine, qazirgi kezeńde kóp kofe iship jatady. Bulardyń barlyǵyn tutynbaýǵa keńes beremin», - deıdi dıetolog Gúlmıra Erbolqyzy.
Tek tamaq emes, shań-tozań, qorshaǵan ortanyń lastanýy, tipti kúızelistiń ózi, osy alergıaǵa ákelip soǵady. Odan qorǵaný úshin aýyzdy ǵana tyımaı, kıimge de mán berý kerek.
«Barynsha jabyq kıiný, bas kıimderdi kıýge keńes beremin. Jazdyń eń ystyq kúnderinde eki qabatty flanelıden tigilgen dymqyl maska kıý kerek. Kún sýytyp, jańbyrlar bastalǵanda pollınozdyń maýsymy aıaqtalady, tamyzdyń 10-ynan 20-syna deıin – alergıanyń órship turatyn mezgili. Ósimdikterdiń 187 túrinen 140 osy 10 kúnde birdeı gúldeıdi. Sondyqtan da Qazaqstandyqtar úshin bul mezgil qolaısyzdyq týdyrady», - deıdi alergolog Rozenson Rafaıl.
Mamandardyń aıtýynsha, alergıadan qulantaza aıyǵý qıyn. Tek aldyn alý kerek. Ol úshin kóktem kelmeı turyp, qys ishinde ımýnıtetti kúsheıtken jón.