Áleýmettik osal toptaǵy turǵyndar baspanaly boldy.
Naýryzbaı aýdanynyń «Shuǵyla» yqshamaýdanynda ornalasqan «Alem City-2» turǵyn úı kesheninde salynǵan 3 úıden birinshi bolyp halyqtyń áleýmettik osal tobynda kezekte turǵan turǵyndarǵa 124 páterdiń kilti tabys etildi.
Kópten kútken qýanyshyn jasyra almaı, júzderi qýanyshtan alaburtqan shahar turǵyndarynyń alǵashqy tobyna páter kiltin saltanatty túrde Naýryzbaı aýdanynyń ákimi Nazıra Toǵyzbaevanyń ózi tapsyrdy. Bul kúni baspanaly bolyp, mol qýanyshqa kenelgen áleýmettik kómekke asa muqtaj jandardyń qala ákimshiligine, aýdan basshylyǵyna alǵysyn jaýdyrǵanyna kýá boldyq.
Almaty qalasynyń ákimi E.Dosaevtyń tikeleı tapsyrmasymen bıyl shahardyń komýnaldyq-turǵyn úı qorynan halyqtyń áleýmettik osal tobyn quraıtyn tizimde turǵan azamattarǵa kezek tártibimen 2 000 arendalyq páterdi usyný josparlanyp otyr. Aıta keterligi, dál osy kúni aýdan aýmaǵynda tapsyrylǵan 124 páterdiń 75-i – eki bólmeli, 49-y – bir bólmeli. Halyqtyń áleýmettik osal tobyna jatatyn alǵashqy bop páter ıelengenderdiń 35-i – jetim bala, 14-i – İ, İİ toptaǵy múgedek, 8-i – múgedek bala tárbıelep otyrǵan otbasy, 4-i – zeınetker, 63-i – tolyq emes otbasy.
«Jyl sońyna deıin kezekte turǵan qala turǵyndaryna qala ákiminiń tapsyrmasyna saı, 2 000 páter berý usynylǵan. Sonyń 400-i jetim balalarǵa beriledi. Búgin usynylǵan 124 páter kilti on jyldan astam turǵyn úı kezeginde turǵan qala turǵyndary ishindegi halyqtyń áleýmettik osal toptaryna tabystaldy. Olardyń basym bóligi 2010-2011 jyldardan beri kezekte turǵan», – dep málimdedi Almaty qalalyq komýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly.