Partıanyń Jarǵysyna ózgerister engizý kerek. Bul týraly Nur Otan partıasynyń kezekten tys sezinde partıanyń atqarýshy hatshysy Asqat Oralov málim etti, dep habarlaıdy Almaty-akshamy.kz QazAqparatqa silteme jasap.
«Qazirgi tańdaǵy ózgeristerge saı, partıanyń basty baǵdarlamalyq qujattaryn qaıta qaraý qajet dep oılaımyz. Eń áýeli partıanyń Jarǵysyna ózgerister engizý kerek. Partıanyń jáne onyń fılıaldary tóraǵasynyń birinshi orynbasary qyzmetiniń ornyna atqarýshy hatshy qyzmeti engiziledi. Partıanyń strategıalyq qujattaryna ózgerister men tolyqtyrýlar engizý de óte mańyzdy», - dedi A. Oralov.
Onyń aıtýynsha, qazirgi kúni arnaıy jumys toby Nur Otan partıasynyń 2030 jylǵa deıingi «Baqýatty qoǵam: onjyldyqtyń 10 maqsaty» jáne 2025 jylǵa deıingi Sybaılas jemqorlyqqa qarsy is-qımyl baǵdarlamalaryn qaıta qaraýǵa kiristi.