19 naýryzda ótetin Májilis jáne máslıhattar depýtattary saılaýy aldynda saıası partıalardyń pikirsaıysy kúni belgilendi. 16 naýryzda saıası partıalardyń saılaýaldy debaty ótedi.
Bul týraly Ortalyq saılaý komısıasynyń otyrysynda málim boldy, dep jazady Almaty-akshamy.kz inbusiness.kz-ke silteme jasap.
«QR Saılaý týraly zańynyń 28-babynyń 3-tarmaǵyna sáıkes, Ortalyq saılaý komısıasy saılaýǵa qatysatyn saıası partıalardyń debatyn uıymdastyrady. Osy oraıda Ortalyq saılaý komısıasy óz quzyretine sáıkes, pikirsaıysty ótkizý erejeleri men qaǵıdatyn bekitti. Qabyldanǵan sheshim boıynsha saıası partıalardyń pikirsaıysyn ótkizý 2023 jylǵy 16 naýryzǵa belgilendi», – dedi Ortalyq saılaý komısıasynyń múshesi Anastasıa Shegorsova.
Televızıalyq pikirsaıys «Habar» telearnasynyń efırinen kórsetiledi.
«Teledebat ótkizý boıynsha qaýly bir aýyzdan qabyldandy. Osy qaýly Májilis saılaýyna qatysatyn saılaýaldy shtabtarynyń nazaryna jetkizilsin. Ortalyq saılaý apparaty «Habar» agenttigimen saılaýaldy pikirsaıys ótkizý týraly shart jasassyn», - dep málimdedi Ortalyq saılaý komısıasynyń tóraǵasy Nurlan Ábdirov.