Búgin Senattyń jalpy otyrysynda Qazaqstan Respýblıkasy Áleýmettik kodeksi men ilespe zańdar qabyldandy, dep habarlaıdy Almaty-akshamy.kz QazAqparatqa silteme jasap.
«Áleýmettik kodeksti ázirleý - halyqaralyq standarttarǵa saı keletin áleýmettik qorǵaý júıesin qurý jónindegi memlekettik saıasattyń strategıalyq mańyzdy sheshimderi men nátıjeleriniń biri. Áleýmettik kodeks ártúrli zańnamalyq aktilerdiń ornyna áleýmettik saıasattyń quqyqtyq negizi bolmaq, onyń negizgi basymdyqtary - halyqty jumyspen qamtýdy yntalandyrý jáne azamattardyń áleýmettik qorǵalý deńgeıin arttyrý. Júrgizilgen reformalardyń nátıjesinde halyqty áleýmettik qorǵaýdyń kóp deńgeıli júıesi qurylady jáne áleýmettik qamsyzdandyrýǵa jaýapkershilik memleket, jumys berýshi jáne qyzmetker arasynda bólinetin bolady», - dedi senator Lázzat Qaltaeva.
Osy oraıda ol qujattardyń negizgi baǵyttaryna toqtaldy.
Múgedektigi jáne asyraýshysynan aıyrylýy boıynsha memlekettik áleýmettik járdemaqylardyń, múgedektigi bar balany tárbıelep otyrǵan adamdarǵa, birinshi toptaǵy múgedektigi bar adamǵa kútim jasaýdy júzege asyratyn adamdarǵa beriletin memlekettik járdemaqylardyń somasyn ósirý eskerilgen. Sondaı-aq saıası qýǵyn-súrgin qurbandaryna jáne saıası qýǵyn-súrginnen zardap shekken, múgedektigi bar nemese zeınetker bolyp sanalatyn adamdarǵa, erekshe eńbegi úshin zeınetaqy bekitilgen adamdarǵa arnaýly memlekettik járdemaqylar somasyn kóterý qarastyrylǵan.
Depýtattyń aıtýynsha, qylmystyq-atqarý júıesi mekemelerindegi jáne birinshi toptaǵy múgedektigi bar sottalǵanǵa kútim jasaýdy júzege asyratyn sottalǵan adamdarǵa memlekettik járdemaqy alý quqyǵyn berý qamtylǵan. Járdemaqy somasy shamamen 65 myń teńgeni quramaq. Qazirgi kezde birinshi toptaǵy múgedektigi bar 54 adam sottalǵan.
Sonymen qatar júrip-turýy qıyn birinshi toptaǵy múgedektigi bar adamdarǵa qyzmet kórsetetin jeke kómekshilerdi mindetti áleýmettik saqtandyrýmen qamtamasyz etý eskerilgen.
«Bul norma birinshi toptaǵy múgedektigi bar adamdarǵa qyzmet kórsetetin 30 myńǵa jýyq jeke kómekshini mindetti áleýmettik ári medısınalyq saqtandyrýmen qamtamasyz etedi», - dedi L.Qaltaeva.
Onyń sózine qaraǵanda, qandastardyń Qazaqstanmen baılanysyn nyǵaıtý jáne elimizde olardyń áleýetin iske asyrý maqsatynda bıznes- ımıgranttarǵa nemese etnıkalyq qazaqtar (basqa elderdiń azamattary) arasynda kásipteri bar adamdarǵa beriletin «Ata joly» kartasy uǵymy engizildi.