Parkıngterde elektromobılderdi zarádtaý stansıalaryn paıdalanýǵa jol berilmeıdi
Tótenshe jaǵdaılar mınıstrligi azamattardyń elektromobılder men olardy zarádtaý stansıalarynyń ornalasýy týraly kóptegen ótinishterin eskere otyryp, bizdiń elde olarǵa qoıylatyn talaptardyń joqtyǵyna alańdaýda.
Bul fakt barlyq múddeli memlekettik organdar tarapynan erekshe nazar aýdarýdy talap etedi. Óıtkeni sońǵy ýaqytta búkil álemdegideı bizdiń elimizde de elektromobılderge suranys artyp keledi, dep habarlaıdy Almaty-akshamy.kz QR Tótenshe jaǵdaılar mınıstrligine silteme jasap.
İshki ister mınıstrliginiń málimetine sáıkes aǵymdaǵy jyldyń 25 qyrkúıegindegi ahýal boıynsha respýblıka aýmaǵynda 6,5 myńnan astam elektromobıl paıdalanylýda.
Bul rette elektromobılderge ornatylǵan batareıalar elektr qýatyn jıi zarádtaýdy qajet etedi. Búgingi tańda elimizde turǵyn jáne qoǵamdyq ǵımarattardyń avtoturaqtary men parkıngterinde zarádtaý stansıalarynyń belsendi ornatylyp jatqany baıqalady.
Sonymen qatar, TJM elektromobılderde ornatylǵan lıtıı-ıondy akýmýlátorlardyń órt qaýipti sıpattamalaryna nazar aýdarady. Elektromobılderdegi órtti sóndirýdiń sheteldik tájirıbesi lıtıı-ıondy batareıalardyń tuıyqtalýy, isten shyǵýy, ózdiginen tutanýy jáne jarylýy múmkin ekenin kórsetedi.
Osyǵan baılanysty, TJM elektromobılder men olardyń zarádtaý stansıalaryn ornalastyrý jónindegi halyqaralyq tájirıbeni zerdeleı otyryp, zarádtaý stansıalarynyń ornalasqan ornyna, ornalastyrylatyn elektromobılder men zarádtaý stansıalarynyń sanyna qoıylatyn talaptardy, eń az araqashyqtyq jáne t. b. belgileý bóliginde sáýlet, qala qurylysy jáne qurylys salasyndaǵy memlekettik normatıvterge ózgerister engizý qajettigin atap ótti. Elektr kóligin paıdalanýdyń praktıkalyq tájirıbesin zertteý úshin Qytaı men Túrkıaǵa qosymsha suranystar jiberildi.
TJM sáýlet jáne qala qurylysy isteri jónindegi ýákiletti organnyń atyna tıisti talaptardy memlekettik normatıvterde belgileý qajettiligi týraly hat joldaǵanyn atap ótemiz.
Osyǵan baılanysty, TJM ártúrli maqsattaǵy ǵımarattarynda elektromobılderge arnalǵan zarádtaý stansıalaryn ornalastyrýǵa jol berý bóliginde memlekettik normatıvterge qajetti talaptardy zańnamalyq retteýden jáne olar engizilgennen keıin qabyldanǵan túzetýlerge sáıkestikke keltirý maqsatynda órt qaýipsizdigi qaǵıdalarynyń talaptary qaıta qaraıtynyn habarlaımyz.
Joǵaryda aıtylǵandardy eskere otyryp, tıisti normatıvtik quqyqtyq aktiler qabyldanǵanǵa deıin bokstarda, parkıngterde, kólik quraldaryn qoıýǵa arnalǵan úı-jaılarda, óndiristik garajdardyń úı-jaılarynda, shatyrlardyń astynda jáne elektromobıldi zarádtaýǵa arnalǵan kólikti saqtaý ashyq alańdarynda aınymaly toktyń zarádtaý stansıalaryn paıdalanýǵa jol berilmeıdi.